Gäng ume wirde i gfragt, was e Familiename eingentlich bedüti. Grad chürzlech hani am Telefon mit öpperem übere Familiename Jenni diskutiert. Är syg zwar vom Heimatort här vo Eggiwiu, aber dä Name töni doch so frömd. Dr Grossätti heig gäng gseit, ursprünglech syge das Zigüner gsy.
Es isch tatsächlech so, dass dä Familiename ir ganze dütschsprachige Schwyz vorchunnt. Das isch aber nid eso, wüu die Jennis ir ganze Schwyz umezoge sy u drum hüt no gäng aune Orte vorchöme.
Familienäme mit emene «i» am Schluss sy i fasch aune Fäu ehemaligi Vornäme, wos zumene Familiename brunge hei. I dene Familie hei fasch aui Generatione «Jenni» gheisse, so dass me de vo «Jennis» gredt het u so ab em Jahr 1400 ume die hütige Familienäme sy entstande. Unger Jenni muess es sech auso umene gute aute Vorname handle: Genau, Hans! Dr Ursprung isch natürlech Johann oder Johannes. Scho im Mittuauter isch dä Name bekannt und bebliebt gsy. No hüt gits «Jenni» u «Jenny» im Ämmitau i de Gmeinde Bowiu, Eggiwiu, Niederhünige, Signou u Zäziwiu. Grad die vo Eggiwiu sy sehr hüfig. Weni e Blick i ds Äntlibuech mache, de finge mir die «Jenni» o dert, nämlich ds Dopplischwand, Äntlibuech, Äschlismatt, Marbach, Flühli u Romoos. Es isch aber nid dr einzig Familiename, wo us Johann entstange isch: O Tschanz u Joussi chöme vo dere Person us em nöie Teschtamänt.
Im Ämmitau chunnt dr Familiename Jenni scho im erschte Udelbuech vor Stadt Bärn vor. E «Uelli Jennis» us Raufli het dr Stadt Bärn dr Uduzins zaut, dass är gäge die viele Ritter im Ämmitau gäng ir Stadt Bärn het chönne prozidiere. E Bärnhard Jenni isch 1538 aus Eggiwiuer Verträter vo de Töifer z Bärn a dr Disputation derby gsy. Me het de aber ds Täuferwäse verbotte. Aber äbe, im Eggiwiu hets auso scho denn Jenni gä.
E Peter Jenni isch 1708 gebore u het i de 1750er-Jahr im Truebschache zersch e florierende Handu aagfange u het de o aagfange mit Sidebängle z wäbe. Är het derzue usem Basuland sogar Meischter u Lehrwäber beschäftiget. Das isch nid so erfougrych worde wie dr Handu. Aber das bekannte «Himuhus» in Truebschachen het är la boue. Wos du hingerzi isch, het de schliesslech dr Trueber Murhofer die ganzi Sach vom Jenni überno u isch rych worde.