Ds Gländ het d Form vonere grosse Chornwanne. / Bild: zvg
Öppe füfzg Ortsnäme mitem Wort «Tau» hani im Gebiet vor «Wuche-Zytig» gfunge. Die sy unger angerem Wäge ihrer Form ungerschiedlech benamset worde. Grad drümau gits «Wannetau»: Ir Gmein Dürreroth, ir Gmein Hasli u i dr Gohl, Gmein Langnou. Ds Wort Wanne stammt übrigens nid vo dr Badwanne ab. Dr Ursprung isch ds authochdütsche «wanna». Badet hei im Mittuauter nume die Oberschte vo de Oberschte. E Wanne het me aber bir Getreideärnt brucht. Nachem Drösche het me d Chärne no müesse reinige u das het me mit dere Wanne gmacht. Es handlet sech eigentlech meh um ne ganz flache Chorb. Weme när das Gmisch het id Höchi gschosse, de het sech de d Spröi vom Weize trennt.
Gömer zumene Tau mitere Form wiene Chänu: «Chäneltau» ir Gmein Oberthau. Das isch auso es Tau im Tau sozsäge. Die Gmein het scho 1529 genau eso gheisse, wie me imene Urbar vo denn cha gseh. Intressant isch no, dass es nume Ober- aber kes Ungertau git – unger dranne isch ja Zäziwiu u Bowiu. Dr Ortsname Oberthau isch vo däm här aus Abgränzig vom Chisetau z verstah, wo Zäziwiu u Bowiu drzue ghöre. Im Oberthau hets no e wytere spannende Ortsname mit «Tau» – o weme das nid grad ufe erscht Blick gseht: «Rintuacher». Das Tau het auso d Form gha vonere Rinne. Dä Ortsname steit imene Urbar usem Jahr 1531. Das Tau isch äue gäge Zäziwiu ache gange – isch ja logisch, wärdet Dir säge – ja, aber me fingt dert o historischi Erwähnige vonere «Rindellmate». Wo genau, hani aber nid usegfunge.
Het äch ds Gebiet «Chäsetu» bi Arni d Form vomene Chäs? Weme die Sach aaluegt, de
muess me säge, das chönnt o «Wäuetau» heisse. Aus Ursprung vor Bezeichnig «Chäsetu» chöme zwo Sache i Frag: Erschtens, es isch dert gkäset worde; zwöitens, dr Bewirtschafter het Abgabe i Form vo Chäs müesse leischte. Ds zwöite isch gar nid so unwahrschynlech. Zinset worde isch früecher mit auergattig Sache; i ha einisch imene Vertrag gläse, das eine sim Glöibiger ufe St.-Martins-Tag 60 Eier het müesse bringe – de isch ömu de klar gsy, dass es dert Eiertätsch het gä. U mit Chäs isch o zaut worde. D Kapuziner im Chloschter z Schüpfheim zum Byspiu hei aube o nach auter Tradition veiechli mängge Lyb übercho.