Viu Plän für ne Strass uf Schangnou

Weme miteme Fahrzüüg, u sygs nume es Rossfuehrwärch, uf Schangnou het wöue, so isch das über Jahrhunderti nume über Marbach gange. Das wär für d Schangnouer eigentlech kes Problem gsy, we die Marbacher nid im Luzärnische u drum im Ussland wäre gsy. D Bärner Regierig het das gäng gstört. Si het sech überleit, wo me e Wäg über bärnischs Land chönnt mache. Ds eutischte u miner Aasicht na ds abstrussischte Projekt isch e Bärgstrass gsy vo Oberried am Brienzersee über d Allgöilücke bis ache i Kemmeribode. Im Staatsarchiv hani dadrzue e detaillierte Plan vo 1845 gfunge. Mindischtens 6 Fuess breit (auso 1,80 Meter) hät die Strass söue wärde. Wo dr Plan isch zeichnet gsy, het me de o d Chöschte usgrächnet u de schynbar nümme wyter gmacht. Schaad. Für mänge Töfffahrer wär das e Troum gsy. Ds Gebiet Allgöi, Bramisegg u Schattwaud ghört ja zu Oberried; aber ersch sit 1832. Vorhär het das Land de Gmeine Oberried, Niederried u Eblige zäme ghört. Das chönnt de o dr Grund sy, dass me die Strass vo Oberried übere ids Ämmitau het aagfange plane. Über 40 Jahr lang isch nächhär drüber gstritte worde, öb me itze e Strass vo Schangnou über Eriz übere Grüenebärgpass uf Habkere söu boue oder ob e Strass vo Schangnou uf Eggiwiu nid gschyder wär. Agfange mit dr Planig het me um 1860 mit ere Verbindig übere Grüenebärgpass. Die Strass isch um 1880 komplett planet, zeichnet u berächnet worde. Vo Schangnou us wär die Strass mit viune Kurve ueche gägem Eriz, dert über ds Rotmoos u übere Pass u när gäge Habkere zue. Das isch du aber o nie z Stang cho. Schlussändlech het me sech glych für d Strass gäge Eggiwiu entschide. Die hütegi Strecki isch 1875 beschlosse worde. Ds erschte Projekt hät e Brügg über ds Räbloch vorgseh. Dr Regierigsrat het de Grossrät aber empfohle, die Strass über ds Tau, Räbeli u Luterstaude z mache. Me het zwar kritisiert, dass es doch e Blödsinn syg, vom Schangou zersch ache u när wieder ueche zfahre, aber es isch de schliesslich gnämiget worde.