I ha ds letschte Mau gschribe, wie d Poscht i ds Ämmitau cho isch. D Fischer-Poscht u de speter d Bärner-Poscht hei nume i grosse Dörfer wie Langnou, Signou u Sumiswaud e Poschtsteu gha. Vo dert us hei d Gmeinde müesse luege. I de meischte Fäu isch e Bot aagsteut worde. Weible hei d Gemeinde scho gha. Die hei müesse d Sünder vor Chorgricht lade u Poscht vom Pfarrer am Landvogt bringe. Z Louperschwiu isch das Amt vom Weibu u speter vom Pöschteler gäng ir glyche Familie gsy. O bi de Poschthauter isch es über Generatione vom Vater ufe Suhn.
Scho um 1750 isch der Chrischte Gasser aus Bärnbot aagschteut worde. Är isch dä gsy, wo füre Landvogt het d Poscht uf Bärn i ds Rathuus brunge. Si Suhn het o no ds Amt vom Grichtsweibu übernoo u isch de o no Sigrischt gsy. Die Gassers sy um 1650 usem Schwarzeburgische uf Louperschwiu cho. O si Suhn het de das Amt übernoo u däm si Suhn, dr Johann Gasser, wo 1785 gebore isch, het de aus erschte die Poschtbotesteu vo Louperschwiu überchoo. Es git da no e Vertrag u nach däm het är zwöi Mau ir Wuche müesse uf Langnou ga Poscht reiche u die ga vertrage. Das Amt isch de 1848 nüm nötig gsy, wiu denn im Löie Louperschwiu dr Wirt die erschti Poschtablag het übernoo. U dä het de säuber müesse luege, wie är zu dere Poscht chunnt. Ob dr Gasser das überno het, weiss i nid, aber vermuetlech scho. Scho zwöi Jahr vorhär het me es Poschtbüro z Zoubrügg eröffnet. Drmit het dr Gasser o nüm gäng uf Langnou müesse. Nachem Gasser hei Mosimaas d Poschtablag ds Louperschwiu übernoo, bis es de het gheisse, d Loupeschwiler schribe zweni Briefe u das Büro zuegange isch.
Z Zoubrügg het am 1. Juli 1846 e Peter Lüthi mit dr Poscht aagfange. Churz drufache het dr Beckermeischter Kräiebüeu d Poscht übernoo. 1877 isch de ds Frölein Anna Stucki Poschthautere worde. Froue hei denn süsch chuum irgendwo chönne es Amt übernäh! D Witwe Anna König-Stucki het das Amt no mängs Jahr gmacht. O z Schüpbach isch von 1873 d Frölein Rosette Hofer Poschthautere gsy, u de bis 1925 ihri Schweschter Elise.