Wo ir Zyt vom Zwöite Wäutchrieg Lehrerinne de Burefamilie im Schangnou sy ga häufe, wüu d Manne im Dienscht sy gsy, sy die «Frölein» skeptisch aagluegt worde: Me het sech nid chönne vorsteue, dass so eini überhoupt cha wärche. Aber nach es paar Tag sy de die Vorurteu furt gsy u d Schangnouer heige die Hiuf afe schetze. «E lueget emel o, was das Frölein us der Stadt für bravi Schueh anhet! U de o no e währschafti Schöibe, wie bi üsereins ufem Land», heigs öppe gheisse. Me heig haut im Schangnou gmeint, dass me ir Stadt nid müess hert wärche. Ei Frou heig anere Lehrere gseit «Weisch, was mi am meischte verwungeret het? Das du es Bürzi hesch!»
Aui Lehrerinne hei am Schluss vo däm Arbeitsysatz gseit, dass si doch es schöns Verhäutnis mit de Schangnouer heige übercho. Me heig enang nid kennt, die meischte Bürinne syge chuum einisch usem Schangnou use cho u vo dene acht Lehrerinne heige die wenigschte Erfahrige mit em Landdienscht gha.
Uf au Fäu heige d Schangnouer meh vo dene Dienschte wöue, aber d Lagerleitere heig lang nümm aune eini chönne schicke. Ds Trudi schrybt i ihrem Bricht im «Bund», dass o si aus Lehrere viu heig glehrt. Nachem Fäge vo de Böde heig me am Samschtig no d Härdöpfu müesse hacke. Dr Rügge heigere scho vorem Mittag weh taa. Aber das syg bis i Aabe so wytergange. Si meint de no, dass si i Zuekunft d Härdöpfu mit meh Respäkt wärd ässe. Es paari vo de Fröilein heige o müesse Hemmli näie, Hose blätze u Chleider ändere. E Püüri heig nume dr Huufe zeigt u de syg die jungi Lehrere drahi. Si syg vo dene Froue u Manne o beydruckt, schrybt ds Trudi, wo ohni z jammere jahrus jahry die schwäri Arbeit mache u vo schnäu rych wärde, redt niemmer.
Aber o die Aabete im Lager syge unvergässlech worde. Jedes heig verzeut, was es so erläbt heig, me heig es Klavier gha u sy heige viu gsunge. Es paari heige für d Ching no Strümpfli glismet ufem Ofetritt obe u ume gross Tisch heigs Lüt gha, wo läse, schrybe u lafere. Einsch syg sogar dr Kari Uetz vom Trueb cho vorläse, aber o d Elisabeth Müller vo Langnou. Es syge nid gäng glychviu Lehrerinne da gsy, ds Trudi schrybt, dass si säuber au föif Wuche im Schangnou heig gschaffet. Me syg aube zfriede hei: Me heig dr Heimat e Dienscht taa u me heig säuber o öppis drvo ghaa.