Im Ämmitau u Äntlibuech hets viu Waud u vo de Boumarte här, hets klar am meischte Tanne. Weler Boumarte sy eigentlech i Ortsnäme mitem Wort «Tann» gmeint? Vor auem Wysstanne u Rottanne. Ds Wort «Tann» stammt vom authochdütsche «tanna» ab, wo näb dr Wyss- u dr Rottanne o d Föhre meint, wo me ja o Dähle seit.
Lärche, wo me ja hie o es paare fingt, sy offebar nid eso bezeichnet worde – si eigne sech ja o nid aus Tanneboum, ussert me wott eine, wo de ömu nid nadlet! Ortsnäme mit «Lärche» hani im Gebiet vor «Wuche-Zytig» abgseh drvo o kener gfunge. Dr Ortsname «Than» oder «Taan» gits de hingäge grad es paar Mau: Bekannt isch ds Gebiet «Than» zwüsche Raufli u Zoubrügg, wo scho i de Amtsrächnige vo 1760 genau eso isch bezeichnet worde. Ganz ir Neechi, im Ungerfrittebach, gits de no ds Heimet «Vorder Than» Wyter fingt me wyt obe ar Schratteflueh ungerem Hängscht äbefaus es «Tan», aber o d Kombination mit «-flueh», «-bode», «-grabe» u «-risi». O bi Oberdiessbach hets aube es «Than» gä, wie me imene Urbar vo 1532 geseht. Das isch zimli sicher würklech Waud gsy. Ganz sicher isch die Sach bim Than uf der Gränze vo de Gemeinde Zäziwiu u Oberhünige. Dä Waud isch offebar o aus «Tannwaud» bekannt, woby beidi Wörter ds Glyche meine. No euter isch d Bezeichnig «Houz» für Waud: Ir Gmein Hasli gits de hingäge d Kombination «Tannhouts». Scho e Schritt wyter isch de «Tannenschwandweyd» z Sumiswaud, wo 1732 eso erwähnt isch. I dere Bezeichnig steit grad, dass dä Waud isch grodet u aus Weid isch gnutzt worde.
Dass sech Waud aus Orientierig guet eignet, zeigt sech da dranne, dass es «Tannacher» – dr Acher vorem Waud – im Gebiet vor «Wuche-Zytig» grad acht Mau git.
Immerhin zwöi Mau hani wyter düüri Tanne gfunge. Z Bigle sy die Tanne scho um 1500 am Verdore gsy, wie dr Ytrag imene Urbar zeigt: «Die erste zelg wider lù tenwil uß heisset im dùrren tan». Hüt hets dert bi däm Heimet gar ke Waud meh. Düüri Tanne hets wyter o bi Langnou gä, dert gits dr «Düretangrat». D Bezeichnig göng uf ne Wättertanne zrügg, wo vor langer Zyt syg düür worde u me när umglaa het.