Im Gmeinsarchiv vo Schangnou hani Ungerlage gfunge für ne nöii Chiuche. Die Plän sy vo 1848. Die nöii Chiuche wär für 600! Lüt planet gsy. Drby isch no es Schrybe gsy vom Kantonsboumeischter Funk. Dä het die Plän zeichnet u mitem Devis am Boudiräkter, auso am Regierigsrat, am 17. Jänner 1848 gschickt. Är heig scho einisch, im Juni 1847, es Projekt zeichnet gha, wo aber de Schangnouer nid heig gfaue. Die Chiuche syg z chly, schrybt är. Die nöii Chiuche hät öppe 30 Meter läng söue wärde. Dr Funk schrybt, dass die auti Chiuche gar nüt me wärt syg, es lohni sech nie die z repariere oder z vergrössere.
I frage mi natürlech scho, warum
d Schangnouer denn hei e nöii Chiuche wöue. Guet, we öpper vo Wigge uf Schangnou wott, muess är dür Marbach düre. D Chiuche vo Marbach isch öppe 300 Jahr aut u tou grösser weder die vo Schangnou. Isch es dr Niid gsy? Weme d Brichte vo de Pfärrer list, isch es ömu nid d Frömmi gsy; jede het gjammeret wüu gäng nume so weni Schangnouer z Predig sy cho.
Der Boumeischter Funk het o dr bishärig Standort nid guet gfunge. E nöii Chiuche heig dert ke Platz. D Schangnouer hei aber scho gluegt u am Boumeischter gseit, die nöii Chiuche chönn de grad bim Pfarrhus gäge Buembach bout wärde. Si überchöme de vom Landbsitzer dert öppe e Jucherte Land.
D Schangnouer hei die Plän a dr Gemeinsversammlig vom 17. Jänner 1848 aagluegt u beschlosse, die z boue. Da wär aber äbe no eis Problem: ds Gäut. Si wäre gärn bereit, Materiau z liefere, aber boue söu de Bärn säuber! Das läng de niene häre süsch. Sie heige viu armi Lüt u weni Verdienscht. Versproche het aber dr Gmeinrat am Regierigsrat, dass d Schangnouer i Zuekunft «in jeder Hinsicht… für die erwiesenen Wohltaten des Staates …für das Gelingen des schönen und guten Werkes sich würdig und dankbar erzeigten».
De isch uf einisch Funkstiui gsy. Ersch im Oktober 1853 het dr nöi Boudiräkter am Statthauter vo Signou befohle, är söu z Schangnou nachefrage, ob das no aktueu syg. Vermuetlech nid. Dr Statthauter het de drufache die ganzi Sach am Gmeinsschryber gschickt zum Ablege. Das het är gmacht, u itz hei mir das Couvert ume gfunge. Schynbar weiss aber im Schangnou niemer me öppis vo däm Projekt u die auti Chiuche steit no gäng!