Dr «sprossend Bärlapp» isch eini vo verschiedene Bärlapp-Arte. / Bild: zvg
Handwärch, Pflanze u Ortsnäme hange mängisch äng zäme. I mim
letschte Bytrag hani unger angerem vonere Folle gschribe, wo me het d Miuch gsiblet. Aus Siib het me nid nume Chriis brucht, sondern o angeri Pflanze; eini isch nach däm Zwäck benamset worde: «Vouesschübu». Uf das hei mi e Läsere u e Läser ufmerksam gmacht – merci viu-mau! Imene Pflanzeverzeichnis hani de das Chrütli gfunge, wo uf Hochdütsch «Bärlapp» heisst. Das isch e Art Moos, wo fasch eso, wie ganz chlyni Tanndli usgseht u sech sicher guet het geeignet, für Miuch z sible.
Das Pflänzli, wo äbe wie nes chlyses Tanndli usgseht, bringt mi grad zum nächschte Thema: Tanne. Die stöh ja i dere Zyt o wieder im Mittupunkt u spände mit ihrne Cherze e chly Liecht. Ortsnäme mit «Tann» fingt me hieumenang ganz Hüüfe – isch ja klar, weme däicht, wie viu Waud, dass es het.
Schlicht «Tanne» heisst e Wyler im Tau vom Luterbach, wo aus Enklave zur Gmein Oberburg ghört. Um dä Ort ume hets im Prinzip no hüt uf aune Syte Waud. Genau vor 700 Jahr isch dä Ort zerschte Mau imene Dokumänt erwähnt worde: «ein matten im Tanne bi Krovchtal». D Schrybwys isch auso denn scho genau glych gsy, wie hüt. Entstange isch die Bezeichnig zimli sicher, wüus dert uffäuegi Tanne het. Genau glych isch d Härleitig bim Übergang «Tanne» zwüsche Arnisagi u Obergoudbach.
Wyter fingt me grad mehreri Heimet, wo «Tannen» heisse: Zum Byspiu i dr Gmein Affoutere, wo dr erscht Ytrag «Peter zer Tannon» im Jahr 1389 isch gmacht worde. O a dr Wintersyte vo Langnou heisse Heimet «Tan-
nen». Nume ei Buechstabe weniger het «Tanne», wos uf dr Mutte z Signou u o z Zäziwiu git.
Im nächschte «Ört u Näme» luege mer dene «Tann»-Ortsnäme de no chly gneuer uf d Nadle.