Dr Klaviermacher Howart vo Wängi syg i de 1780er- u 1790er- Jahr gäng i d Furgge ueche u heig i dene Wäuder nach magere Tanndli gsuecht, wüu är die für d Resonanzböde vo sine Klavier heig brucht. Das isch natürlech e interessanti Sach! I bi däm nache u ha dr Mirko Weiss z Chröschebrunne gfragt, ob är da öppis chönn drzue säge. Är bout u repariert säuber Taschteinschtrumänt. Tatsächlech gits die Familie Howart oder Houert vo Wängi, wos drei Klaviermacher het gää, we die o zum Teil ihrer Firme z Nöieburg hei gha. Dr Pfarrer Ängimaa schrybt, dass me de die magere Tanndli heig i längi dünni Brättli gsaget, öppe «6 Schuh lang», das isch ungfähr 1,80 Meter läng. Die heige si de zämebunge u när syge die vom Klaviermacher abghout worde. Är heig denn no gseit, dass är o Chunde z Ängland heig. Houz usem Schangnou isch aber äue nie uf Ängländ exportiert worde – i vermuete, dass haut dr Napoleon u siner Chriege bi däm Exportgschäft sy drzwüsche cho.
Itz chumeni no einisch zrügg zur Franzosezyt. Im Ämmitau sy eigentlich d Franzose u d Revolution zersch begrüesst worde, me het sitem Burechrieg nüt me uf de gnädige Herre gha. Langnou u Trueb sy klar revolutionär gsy. Schangnou, schrybt dr Pfarrer Ängimaa, heig nie öppis gäge d Herrschaft vo de gnädige Herre gha. Guet, dr Pfarrer isch sowieso bärntröii gsy, die sy ja o vo Bärn zaut worde. Schangnou heig vor dr Revolution meh Gäut vo Bärn übercho, weder was me a Abgabe het müesse zale. Meh weder d Heufti vo de Aupe sy im Bsitz vo Bärnburger gsy – die hei auso ds Schangnou guet kennt u profitiert vom Aupchäs. Dr Pfarrer het aber gmerkt, dass zwe Schangnouer uf Langnou syge u dert bim Erzrevolutionär Niklous Augs-
purger vo Grosshöchschtette d «Revolutionsschueu» heige bsuecht. Dr Augspurger het scho vorem Ymarsch vo de Franzose probiert, im Ämmitau e Revolution gäge Bärn aazzettle, isch aber de i d Chischte gheit worde u unger de Franzose zum Senator vor Helvetische Republik worde – so chas ga!
Dr Pfarrer Ängimaa isch im Rückblick uf sini Zyt im Schangnou verbitteret gsy: Im Gmeindrat heigs ir Zyt vor Helvetische Republik nume Lüt gha, wo heige gschleglet. Är heig zwar uf dr Kanzle drgäge gredt, aber die, wos hätte söue ghöre, syge sowieso nie z Predig cho!