Langnouer Gschiir mit Schangnouer Lätt

Lätt hets im Schangnou o gha, aber e kener Hafner. D Chachugschiirli het me ufem Märit gkouft. Ds Zäntrum für das isch natürlech Langnou gsy. Sit öppe 1650 hei Herrmanns z Langnou Gschiir gmacht. Dr Lätt isch houptsächlich us em Schangnou cho. Dr Pfarrer Ängimaa cha nid verstah, warum d Schangnouer nid säuber Gschiir hei gmacht. Bsungers schöne Lätt gäbs uf dr Wimmisaup, schrybt dr Ängimaa wyter. Aber o no anger Steue syge bekannt – so gits no hüt e Hof, wo Lätthubu heisst. Dr Pfarrer heig de Gmeinsvätter gseit, es wär doch guet, we öppe e Verdingbueb würd Hafner lehre?! Aber das heige die nid wöue. Dr Pfarrer schrybt resigniert: «…einträgliche und nützliche Nahrungszweige zum Gedeihen zu bringen wird bey den Landgemeinden immer sehr schwehr halten…» Me hets gäng so gmacht, wärum sött me itz öppis ändere?

Im Jahr 1801, wo dr Pfarrer Ängimaa das Verzeichnis gschribe het, isch ir Wäut viu gange; me chönnt säge, es isch e verruckti Zyt gsy. Z Frankrych isch d Revolution scho bau fertig gsy. Dr «Premier Consul» Napoleon Bonaparte het sech de im Jahr 1804 säuber zum Cheiser gchrönt.
Me oder weniger ghört scho bau ganz Europa am Napoleon. Schangnou isch 1801 e Munizipalität vom Distrikt Oberämmitau, Kanton Bärn, Helvetischi Republik. Me het sech aus «Bürger» aagredt u het d Briefe mit «republikanische Grüsse» ungerschribe. 1799 hei aui Manne müesse dr Eid uf die nöii helvetischi Republik leischte. Im Schangnou isch d Lischte no erhaute. I vermuete, dass dr Munizipalitätsschryber Samuel Mathys vo dr Schürmatt die Näme het ufgschribe. Är isch scho vorhär Gmeinsschryber gsy. Wär Präsidänt isch gsy, weiss i nid, uf der Eidliischte steit nüt. Vermuetlich het sech niemer um das Ämtli zangget. Dr Agänt drgäge isch ytreit.
Das isch dr Melchior Cherli vom Buembach gsy. Dr Agänt isch dr Verbindigsmaa zwüsche dr Helvetische Regierig u dr Munizipalität gsy. Die Helvetischi Republik isch organisiert gsy, wie hüt Frankrych – aues vo obe gäge ache. Dr Chrischte Gärber vom Waud het o es Amt gha. Är isch Distriktrichter vom Oberämmitau gsy u dr Samuel Sigenthaler vo dr Stägmatt si Steuverträter.