Es het mi intressiert, was so vor 100 Jahr im Schangnou isch passiert. Vor auem settig Sache, wo so wichtig sy gsy, dass me ir Zytig öppis het gschribe.
Dr erscht Ytrag, woni ha gfunge, isch vom 19. Juli 1925. Es geit umenes Uwätter. Zwo Stung lang heigs gschüttet u ghaglet. Ds Zäntrum vom Gwitter isch ds Tobu vom Dorf ueche ufe Wachthubu gsy. Dr Färzbach isch zum Fluss worde u d Staatsstrass u es paar Hüser sy komplett überschwemmt gsy. O vom Waud här isch e bruune Strom gäge ds Dorf ache zoge. Bir Wirtschaft Löie heigs Outo- u Velofahrer gha, vor auem Tourischte, wo heige wöue flüchte.
Si heige aber müesse dert blybe, wüu unger- u obedrann d Strass isch verschüttet gsy. O dr Wäg vom Buembach i Chemmeribode isch nümm z bruche gsy.
D Brügg bir Sagi isch furt gsy u vermuetlich irgendwo im Räbloch unger glandet. Ersch nach einige Tag het me ume i ds Schangnou chönne. Das isch aber nid öppe ds einzige Uwätter gsy im Schangnou zwüsche 1920 u 1929: Scho am 2. Juli 1920 hets dert kesslet u im Buembach hinger es paar chlyneri Brügge furtgschwemmt. Am 1. Ougschte 1922 hets im Chemmeribode hinger e so schlimm grägnet, dass ds Wasser sogar bis i Spyssaal vom Hotäu syg ichechoo! «Es het eifach e kei Gattig» het e Äupler am Zytigsschryber gseit. D Gmein het überau nach Arbeitslose gfragt, wo chönnte cho häufe.
Me fingt aber o angeri Mäudige vom Schangnou – öppis, wo itz o aktuell isch: Ir NZZ isch am 23. Oktober 1922 gstange, dass dr Borkechäfer im Schangnou heig gwüetet. Es ganzes Stück Waud vo drei Jucherte syg totau vernichtet worde.
Am 26. Februar 1924 isch brichtet worde, dass me im Chemmeribodebad e bekannte u überau gsuechte Hochstapler hei gschnappet: Dr W. Hartmann us Basu. Är heig sech überau i de Frömdeorte aus Sport- u Schiilehrer usgää u de aube siner Chunde u d Hotäu bschisse.
Am Eidgenössische Schwingfescht z Bärn im Ougschte 1921 isch dr Salzmann Gottlieb vo Schangnou zwöite worde. Er het gäge nöi Schwingerchünig, Roth Robert vo Bärn, verlore. Dritt isch dr Müller Karl vo Züri worde. 35 Schwinger hei sech für das Fescht am letschte Tag no chönne qualifiziere. 5000 Zueschouer syge cho. Dr Bundesrat Haab het d Red ghaa.