Dr Pfarrer, wo gärn buret het

Dr Pfarrer Samuel Ängimaa het i sire Zyt aus Pfarrer vo Schangnou es Bücheli gschribe. Är het dert drinne aues notiert, was ihm zum Thema Schangnou isch i Sinn cho. Dr Samuel Ängimaa isch 1748 touft worde u isch Burger vo Bärn gsy. 1775 het är si Usbiudig aus Pfarrer ab­gschlosse u het nächär z Büre a dr Aare es Vikariat gmacht, bevor är vo de Gnädige Herre im Jahr 1786 aus Pfarrer i ds Schangnou isch gschickt worde. Dert het är das Amt bis 1805 usgüebt u isch de nächär uf Krouchtu versetzt worde.
Die Ufzeichnige vo däm Pfarrer sy sehr interessant, weme öppis über ds Läbe z Schangnou i dr Zyt um ds Jahr 1800 wot erfahre. Dr Pfarrer isch o e chly e Buur gsy. Är het veiechly Land gha um ds Pfarrhuus ume u o d Aup Rytzschwändi (hüt Trittschwändi) het zum Pfarrguet ghört. Är het uf sim Land mit Dünger u Bschütti probiert, meh usem Land usezbringe.
D Schangnouer hei öppe e chly dr Chopf gschüttlet ob ihrem Bure-Pfarrer. Är heig o hunderti vo Öpfuböim zweiet u heig ganzi Steichrätte vou Chirschisteine u Obstchärne gsetzt. Si Nachfouger aus Pfarrer schribt, dass dr Ängimaa d Landwirtschaft aus Lydeschaft heig gha u viu Gäut heig investiert. Är syg aber haut o sehr vermögend gsy u heig ke Familie gha, wo koschtet heig. Dr Ängimaa het o sehr viu korrespondiert u gläse, o dr katholisch Pfarrer vo Äschlis- matt, dr Franz Stauder, isch mit ihm befründet gsy – o we si mängisch e chly überenang gsprützt hei. So het dr Ängimaa einisch gseit, dass es bi ihm im Schangnou nume öppe eis unehlichs Ching pro Jahr gäb, ds Marbach aber öppe drü! Dr Pfarrer Stauder meint du nume, dass das nüt mit dr Frömmi vo de Schangnouer chönn z tüe ha, är wüss ganz genau, dass es 700 Schangnouer gäb, u we dr Pfarrer am Sunndig vo dene 50 oder 60 gseih, syge das de scho viu. Die amtlechi Religion schynt scho denn nid wichtig sy gsy. No hüt isch dr Aateu vo de EVP- u EDU-Stimme im Schangnou hinger am töifschte vom ganze Ämmitau.
Ytem, dr Pfarrer Ängimaa isch e guete Landwirt gsy, u e grosse Teu vo dr Chronik isch über d Land- u d Aupwirtschaft. Natürlech het är o dert siner Versüech beschribe, meh us em Land usezbringe.

Im nächschte «Vo früecher» luege mer de, was dr Ängimaa über ds Gwärb gschribe het.