Ört u Näme: Was chunnt öich bim Wort «Schär» i Sinn? E Mus? Oder öpper, mitem Familiename Schär? Was d Ortsnäme mit däm Wort aageit, so isch d Viufaut vo de Dütige äbefaus rächt gross u wäge däm o zimli schwierig.
«Schärlig» isch äue dr bekanntischt Ort, wo zu dere Gruppe ghört. U dä existiert scho sehr lang: Inere Urkunde usem Jahr 1329 isch «am schÊrling» bereits erwähnt. D Schribwys het sech de im Louf vor Zyt geng ume chly gänderet. Imene Dokumänt vo 1531 isch de afe dr «ä» drzue cho: «Schärling». Exakt hundert Jahr speter, auso 1631, isch zerschmau die hütegi Schribwys brucht worde.
Aber was meint «Schärlig»?
Da sy sech d Forscher o nid ganz einig. Es git d Meinig, dass es authochdütsche Personename drhinger stecki, zum Byspiu «Skerilo». U när hät me däm Name de no d ändig «-ingen» aaghäicht u im Louf vor Zyt wär da drus «Skarling» entstande. Das isch aber nid guet müglech, wüu e settegi Entwicklig i dere Gägend bi keim angere Ortsname wär beobachtet worde.
Dere Meinig isch o d Erika Waser, wo sech intensiv mit de Luzärner Ortsnäme befasst het. Aber o si het ihri Meinig müesse revidiere: Si het nämlech «Schärlig» aube zum authochdütsche «scerling» zeut, wo im äntli-
buech u im ämmitau vor auem für d Pflanze Bärechlau brucht isch worde. Si isch aber de zum Schluss cho, dass e wyteri
Variante wahrschynlecher isch:
Ursprünglech het nid ds ganze Tau Schärlig gheisse, sondern nume dä Ort, wo hüt d Wirtschaft Schärligbad steit. U genau dert louft dr Churzebach mitem Schärligbach zäme. Ds Tau geit dert auso usenang wiene Schäri – u das dörfti die Dütig sy, wo am meischte zuetrifft.
Dr glych Ursprung dörfti dr «Schärischache» hinger Bärou ha; vor Form här isch dä schön drüeggig. Dä Ort isch unger angerem i Dokumänt usem Jahr 1791 erwähnt mitem Hiiwys, dass es dert Bureheimet het, mittlerwyle isch es grosses Industriequartier entstange.
Me fingt wyter o Byspiu zum Familiename Schär: «Schärerbärg» uf dr Gränze vo Trachsuwaud u Sumiswaud oder dr «Schärhof», wo quasi zwüsche Wigge u Schärlig ligt. Im eutischte Dokumänt steit dert no d Bezeichnig «Schärers matten».