Ort u Näme: Im Momänt nimmeni grad d Ortsnäme vo Waukringe chly unger d Lupe. Die Gmein fyret hür ds 800-Jahr-Jubiläum.
«Ruben» isch eine vo de Ortsnäme, womer scho lenger isch ufgfaue. Dä Name stammt ja us dr Bibu. Für aui die, wo die chiuchlechi Ungerwysig chly lenger här isch: Dr Ruben isch dr eutischt Suhn vom Jakob. Die zwöuf Sühn vo ihm hei d Stämm vo de Israelite begründet. Id Mundart übersetzt bedütet Ruben «Luegit, e Suhn».
Dass nid grad dä berüehmt Ruben chly ungerhaub vo Bigetu buret het, isch ja äue für aui nahvouziehbar. Aber dr Ort Ruben isch immerhin scho i de Amtsrächnige vo 1770 erwähnt und d Schribwys isch scho genau so gsy wie hüt. Imene Urbar vo 1530 isch wyter «Rubenn mattann» erwähnt, u das dörfti o dert sy. Chly wyter unger im
Bigetu, u vo Gomerchinge här erschlosse, gits d Rubenweid u när hani o no d Variante Rubenschüür gfunge.
Die Ortsnäme sy scho entstange, wüu e früechere Bsitzer eso het gheisse. Aber dr Ursprung isch nid hebräisch. «Ruben» isch d Genitiv-Form vo «Rubi». Dr Persone- u Familiename Rubi – oder o Rubin – isch vor auem im Bärner Oberland verbreitet. Dert chöme aus Ursprung zwo Sache i Frag: Entweder isch Rubi e Churzform vo Ruprecht oder de isch ds aute schwyzerdütsche Adjektiv «rub», «rup» gmeint, wo «kraus» oder «rauh» meint. Es chönnt auso sy, dass e früechere Bsitzer uffäuegi Chrusle het gha.
Die genau glychi Dütig chame o grad bimene zwöite Ortsname dert ir Neechi bruche: Ruppisbärg. Die zwöi Heimet, wo südöschtlech vo Bigetu lige, sy autbeleit. Im «Urbar des Gotteshauses Thorberg» vo 1500 – denn isch dert no es Chloster gsy – isch «Ruoppensperg» erwähnt.
äbefaus e Churzform vomene Personename wie Ruprecht oder o Ruodberth dörfti dr Ortsname «Ruppler» abstamme. Eso wärdi e Wäg bezeichnet, wo vo Signou gäge dr Waudhüsere ueche geit.
äue e Ort ir hütige Gmein Lützuflüeh isch mit däm Ytrag vo 1256 gmeint: «unam schuopozam dictam Ruepelruti, sitam prope curtem Flueeluon». Dr Persone-name Rupel, wo da dr Ursprung isch, chunnt vermuetlech vom authochdütsche «Hruadbald» oder «Ruodbold».