Mit Miuch usem Tau cha me nid chäse!

Vo früecher:

Itz luege mir no d Chäserei vor Gmein Signou a. Die «auti» Chäserei z Schüpbach isch scho 1844 bout worde. Zersch het me nume im Summer käset, aber 1873 isch vergröseret worde u wo me 1900 umbout het, isch e nöimodische Zimätformschtei brucht worde. Im Jahr 1932 isch de die «nöii» Chäserei bout worde u me het die bishärigi Chäserei am Fritz Moser verchouft, wo drinn het e Moschterei
ygrichtet. D Moschterei isch z änd gsy, wo d Umfahrigstraas isch cho u dr Vater Moser het müesse siner öpfuböim umsage. Am nöie Standort isch bis 2016 no käset worde. 

Ir Chäserei im Dorf Signou het me 1861 säuber aagfange. Me het vom «Thurmwirt» es Stück Bouland kouft u 19 Bure hei 1868 e Chäserei la boue. 1950 isch de ds hütige Gebäude uf-
gsteut worde. Hie hani o e Bytrag im ämmitauer Blatt gfunge: D Chäserei Signou het 1876 e Uszeichnig übercho. Drby het d Chäsereignosseschaft o la usrichte, das ihrer Bure für Wintermiuch 28 Rappe dr Liter u für Summermiuch 31½ Rappe pro Liter überchöme. Hüt würd das bedüte, dass d Bure öppe vier Franke pro Liter Miuch überchämte. 

Eini vo de eutischte Chäsereie überhoupt isch die uf dr Mutte. Scho 1831 isch dert aagfange worde Chäse z mache mit Miuch usem Tau. Die erschti Chäserei, wo settegi Miuch het verarbeitet isch 1815 die z Chise gsy. Vorhär hets gheisse das göng nid, nume Aupmiuch chönn me verchäse. Es isch überliferet, dass die erschte Chäs vor Mutte amene Chrischte Hari vo Kandergrund sy verchouft worde. 1842 het me scho 151 Zäntner Chäs gmacht u dä am Chäshändler Röthlisbärger
z Louperswiu verchouft. Das isch eigentlich o e Signouer, die Familie isch vom Schüpbachstützli (hüt Muttenstrasse 1). Die hei 1850 sogar e Filiale z New York gha. Wo de d Bahn Züri–Bärn isch fertig gsy, sy si uf Herzogebuchsi gange. 1912 isch z Mutte d Chäserei vergrösseret worde u de no einisch im 1936. 1998 isch dr Chäser Anton Wyss sogar Wäutmeischter ir Kategorie «ämmitauer» worde. 

E wyteri Chäserei i dr Gmein Signou isch uf der Höchi. O dert het me scho im 1830 aagfange mit Chäse. Hüt macht dr Alfred Schänk dert au Tag drei ämmitauer Chäse. 



12.12.2019 ::