Z Signou hets früecher e Hüüfe Handwärcher u Lädeler gä. Dr Coiffeurmeister Kurt Röthlisbärger het 2001 ir Gwärbzytig vo Signou e Artiku gschribe über d Gschäft, wos früecher z Signou het gä. Dä Bricht isch mir e grossi Hiuf gsy bi miner Arbeit am Heimatbuech. är schrybt, dass zu siner Jugendzyt fasch i jedem Huus z Signou e Lade oder es Gschäft isch gsy. är verzeut vo Schryner, Mechaniker, Sager, Uhrimacher, Lädelifroue, Wagner und Fielemacher.
Dr Uhrimacher Brönnimaa het nid nume Uhre verchouft u repariert, är isch o zueständig gsy für d Chiuchenuhr. Gäng am Samschtigmorge syg är zersch zum Röthlisbärger für sech la z rasiere u drna syg är ueche i Chiuchturm u heig ds Uhrwärch ufzoge. Wener guet glunet syg gsy, heige öppe Ching mit ueche dörfe ga zueluege, wie är das macht.
Z Signou hets o mehreri Becke gha. Kurt Röthlisbärger schrybt vom Wauter Bütikofer, am Beck mit em schönschte Bart. Bekannt gsy syg är o wäge sine Eiernudle u amene Dessärt us Bisquit u Schoggi, wo är «Exquises» touft heig. Im Usserdorf isch dr Konditor Schärer gsy. Mit sine Ware syg de d Weggefrou de Hüser nache. O Täfeli sy z Signou gmacht worde. Badertschers u später Zouggs sy d Fabrikante gsy. Ersch i de letsche Jahre het me no d Forme für die Täfeli us em Autyse grettet.
Schumacher hets o fasch i jedem Dorf gää. Die meischte sy früecher uf d Stör. Das heisst, dass d Schumacher zu ihrne Chunde sy. Dert hei si sech für ei oder zwe Tag ygrichtet u hei das erlediget, wo ihne d Meischterslüt z repariere gä hei. Die meischte Bure hei säuber Läder gha, u hei de das am Schumacher gä zum Wärche. Me heig vo Schumacher verzeut, wo de öppe e Läderbitz heige mit hei gno. Einisch heig eine es paar Bitze fürigs Soleläder us em Fäischter i Garte ache gheit u däicht, am Abe, wes feischter syg, chönn är die de gäbig mitnäh. Dummerwys het d Büüri grad a däm Tag gchüechlet u Spinetbletter brucht, für se im Teig z tünkle u uszbache. Wo si dä Spinnet isch ga reiche, het si uf ds Mau Läder ir Hang gha. D Büüri isch nid uf e Chopf gheit gsy u het sofort gmerkt, was los isch. Si het aber nüt gseit u die Schuehsole o i Teig ta u gchüechlet. U natürlech het si gluegt, dass dr Schumacher die Sonderaafertigung het übercho – zäi wie Schuehsohle, im wahrschte Sinn vom Wort.