Dr heilig Theodul u dr heilig Georg

Dr heilig Theodul  u dr heilig Georg

«Jodershubu» heisst es Heimet im Eggiwiu, ganz ir Neechi vom Räbloch. Grundsätzlech isch die Sach klar: Das isch dr Hubu, wo dr Familie Joder ghört.

Dr glych Familiename isch dr Ursprung bim Ort «Joderte». Eso heisst es Heimet südlech vom Lehn bi äschlismatt. Dert hets äue früecher einisch ganz viu Joder gä – d ändig «ete» -dütet ömu uf das häre.

Sowit isch aues klar. Aber was bedütet «Joder» eigentlech?
Das isch e mittuauterlechi Variante vo «Theodul»; dä isch e Heilige gsy. Mängisch isch o vom heilige Theodor d Reed u das isch gar nid sone exotische Maa, sondern eine, wo im Wallis het gläbt. Das isch aber scho lenger här. Me weiss zwar nid genau, wenn dass dä Theodul isch uf d Wäut cho, aber um ds Jahr 400 isch är gstorbe. Dä Theodul isch dr erscht -Bischof vo Octo-
durum gsy. -Octo-was? Gmeint isch Martigny.

Me seit, dass är ds Grab vom heilige Mauritus heig gfunge. Uf au Fäu het är dert im Jahr 380 nach Christus d Abtei St. Maurice la boue – eis vo de eutischte Gotteshüser vor Schwyz.

Es wird überliferet, dass är es ertrunknigs Ching wieder zum Läbe heig chönne erwecke. Die zwöiti Legände isch eini, wo guet i ds Wallis passt: Inere Miss-ärnt heig är Fesser vo de Winzer mit nume eire einzige Trube chönne füue!

Wemer grad bi de Heilige sy, de hani no eine: dr heilig Georg. Es git zwar weder im ämmitau no im äntlibuech e Ort, wo «Sankt Georgie» heisst oder ähnlech. Was me aber i de Ortsnäme fingt, isch d Abchürzig «Jörg». Ir Gmein Trachsuwaud, chly öschtlech vom Schloss, heisst es Heimet «Jörbärg». U im Eggiwiu gits es «Jörhus». «Jör» isch e Abchürzig vo «Jörg». Es isch i beidne Fäu aaznäh, dass e früechere Bsitzer eso het gheisse.

Es isch an sich kes Wunger, dass o hie umenang Buebe eso sy touft worde. Georg isch eine vo de beliebtischte christleche Heilige. Vo ihm gits e ganzi Zilete vo Legände. Die bekanntischti: Dr Georg rettet e jungfröilechi Prinzässin voreme Drache. är verletzt dä Drache aber nume sövu, dass ne d Chünigstochter no zahm cha id Stadt füehre. Dür sini muetegi Tat bringt dr Georg nächär dr Chünig u au siner Ungertane drzue, sich la z toufe – u när erschlat är de no dr Drache.


Queue: «Ortsnamenbuch des Kantons Bern», «Orts- und Flurnamen des Amtes Entlebuch», www.idiotikon.ch u wyteri. Aafrage: 034 409 40 05 oder zuercher@wochen-zeitung.ch

26.09.2019 :: Bruno Zürcher (zue)