Weme vor Poscht redt, däicht me a d Briefe. Guet, die Junge vo hüt wüsse nümme genau, was Briefe sy. Früecher aber isch das schon no e Sach gsy. Für 2½ Rappe het me e Brief im Ortsrayon chönne verschicke. «Orts-Post» oder uf Französisch «Poste local» het die gheisse. Für die wytere Briefe het me de nume «Rayon» I bis III druf gschribe, was schynbar aui verstange hei. Die blaui Marke «Rayon I» isch am meischte brucht worde. Für ds Ussland het me die Briefmarke nid chönne bruche. Ersch 1874 isch z Bärn dr Wäutposchtverein gründet worde. Ab denn het me überau häre chönne Briefe verschicke. Vorhär het me das nume chönne, weme e Staatsvertrag mit däm Land het chönne abschliesse. 1869 het e Beckermeischter vor Insle La Reunion im Indische Ozean e ganze Ämmitauer-Lyyb bim Chäshändler Joost z Langnou bschteut. Dr Brief isch am 19. Jänner 1869 z St. Denis uf La Reunion uf dr Poscht abgää worde u am 16. Februar 1869 z Langnou aachoo! Mitem Wäutposchtverein sy o d Usslandbriefe günschtiger worde. Das isch no grad für d Schwyz
wichtig worde: Afe einisch sy viu Schwyzer Familie usgwanderet u de het d Schwyz ihrer Produkt o im Ussland wöue verchoufe. Am Aafang hei d Lüt die Marke aber nid gärn brucht: Dr Empfänger chönnt ja ds Gfüeu haa, me lueg ihn für z arm aa, für ds Porto z zahle. Vorhäre het ja geng dr Empfänger ds Porto müesse zahle. D Poscht het da Lösig gha: Si het de einfach ds Porto für so unfrankierti Briefe verdopplet. Das het gwürkt.