So bis um ds Jahr 1980 ume sy fasch aui Briefe no mit Margge frankiert worde. Nume Gschäfts-poscht isch ab de 1950er Jahr mit Maschine frankiert worde. Hie isch ds Ämmitau dran beteiligt gsy, d Frama z Louperswiu isch e Pionier vo Frankiermaschine gsy. Hüt bruchts Briefmargge geng weniger. Vornes paar Jahr hani mau e Schueustung gää zum Thema «Gschicht» u da hani die rund 40 Schüeler u Schülere gfragt, wele Landesname uf üsne Briefmargge stöngi. Ke Arm isch i d Höchi gange. E Erschtklässler het de aber ömu gwüsst, dass uf de Zwänzgi «Confoederatio Helvetica» steit u das äuä dr latinisch Name vor Schwyz syg. Bravo! Wiu me früecher so viu Briefmargge het brucht, isch de o gäng öppe um ds Biudmotiv zangget worde. So het me churz vorem erschte Wäutchrieg nöii Margge usgää mit der Mueter Helvetia druffe. Die Frou isch aber e chly z mager gsy u d Lüt (es wärde äue vor auem Manne sy gsy) heige sech beklagt, dass die Mueter Helvetia zweni Buse heig. Hüt git d Poscht au Jahr so zwüsche 40 u 50 Margge use, aber vo dene rede höchstens no die paar wenige Briefmarggesammler, wos no git. Aber: Letscht Jahr sy zwo Margge usecho zum Jubiläum vo de Diplomatische Beziehige zwüsche Südkorea u der Schwyz. Drzue isch uf dr einte Margge es schöns Dorf vo Südkorea u uf der angere Margge ds Dorf Trueb abbiudet gsy. Es syge tatsächlech nach es paar Wuche die erschte Südkoreaner im Trub uftoucht!
De wäre mir bi de Tourischte aacho. Ussländer sy schon um 1700 ume im Ämmitau uftoucht uf dr Durchreis. Tourismus isch ersch ufcho, wo d Ängländer drmit hei aagfange. Aber mir wüsse, dass schon um 1750 ume Tourischte sy z Langnou gsy, wüu me da schriftlechi Belege het. Die hei nämlich dr Wunderheiler Micheli Schüpbach wöue ga bsueche. Sogar dr Goethe isch ja wäge däm einisch d Langnou gsy. Dr Komponischt Felix Mendelsohn, wo me hüt no beschtens kennt, het nachwyslech einisch z Langnou übernachtet u het dert amene Fescht dr Ämmitauer Hochzytsmarsch «By aube e wärtig Tochter gsy» ghört. Das Lied het är de schpäter inere Symphonie brucht. Die meischte Tourischte sy aber de ab 1850 cho, wo dr Napf isch ds Highlight isch gsy. Me het i dr Mettle sogar chönne Träger mit Sänfte miete, das me nid het müsse säuber loufe.