Ganz viu Mäudige vo Schangnou

Ds Oberländer Tagblatt het am 22. Horner 1921 brichtet, dass me nöi zwo Stung vo Schangnou ewäg im Rotmoos chönn e Schiihütte miete. Die Hütte liegi im schönschte Schiigebiet am Fuess vom Hohgant am nöie Strässli vo Schangnou übere Grünebärgpass gäge Habkere. Dr Schlüssu chönn me im Löie z Schangnou verlange. 

Unger de Uglücksfäu hani e Bricht gfunge, dass im Februar 1922 z Schangou es zwöijährigs Buebli sis Miuchfläschli heig verbroche u e Schärbe ihm heig e Hausschlagadere verschnitte. Es syg nach wenige Minute tot gsy. Wyter het im Juli 1921 im üssere Windbruch dr Blitz e Sennhütte aazüntet u zwü Rinder töt.  

Im Mei 1921 isch e junge Senn vom Chemmeri bir Rotheflueh bim Bluemesammle abgstürzt. Er syg sofort tot gsy, isch ir
Zytig gstange. 

Im Ougschte 1922 het dr ersch 16-jährig Ernst Hirschi mit sine zwe Brüetsche 200 Sümmerigsschaf uf dr Schybeaup gsümmeret. Es paar mau syg d Herde vomene frömde Hung aagriffe worde – wäge däm hei sech die drei bewaffnet. Wo dä Hung wieder uftoucht syg, heig dr Ernst die Waffe gno, irgendwie fausch aapackt u die ganzi Ladig syg ihm i Haus. Nach es paar Minute syg är tot gsy.

Im Jäner 1927 het dr Karl Gerber Houz gfüehrt mit sim Ross. Är isch hinger em Chemmeribodebad mit sim Fuehrwärch ine Stoublawine cho. Me het ne nach langem Sueche drei Meter töif im Schnee begrabe gfunge. 

Im Novämber 1920 isch im Dorf Schangnou e Velofahrer z Nacht ines Fuehrwärch ychegfahre. Me het dä Velofahrer müesse mit emene Darmriss i ds Spitau uf Langnou bringe. Weder z Fuehrwärch no dr Velofahrer hei Liecht gha! So Fuehrwärch sy gfährlech: Im März 1923 isch dr Ueli Siegenthaler vo Schangnou mit sim Zwöispänner uf Wigge u de sy ihm d Ross usbroche: Dr Ueli isch miteme Schädubruch tot uf der Strass blybe lige.

Aber i ha glücklecherwys o no öppis Erfröilechs gfunge! E Herr Gärber us Busswiu het i sim Testamänt verschiedene
Organisatione mit eme Legat beehrt. So het är 50’000 Franke am Spitau Biel gschänkt u am Schluss vor länge Liste sinere Heimatgmein Schangnou o no 5000 Franke. Mit däm Gäut söu ermüglechet wärde, dass armi Ching e Bruef chönne lehre. 

I dere Zyt sy i dä 131 Zytige 394 Artikle mit em Stichwort «Schangnau» vorcho. Aber i de auermeiste Mäudige geits nume um Zivilstandsnachrichte. He ja, es git gar viu Schangnouer. Aber was wotti öich scho beläschtige mit emene Ytrag unger de Verchündigunge vo «Hofer Eduard, Holzarbeiter, Witwer der Lina geb. Zbinden, von Biglen, in Niederwichtrach mit Dolder, Rosette, Krankenwärterin, ledig, von Schangnau, Postgasse 46, Bern». Dir chöit nid emau meh Ysprach mache gäge die Hürat.

25.06.2020 :: Hans Minder

Weitere Artikel