Grad im Momänt bini am Kapitu Grüenematt Trachsuwaud Dürr. Es isch meh oder weniger ds Wirtschaftszäntrum vo Lützuflüeh. Scho um 1600 isch dert e Mühli u e Sagi gsy. Dert isch no hüt ds Gwärb aagsidlet. Wo 1910 d Ysebahn vo Ramsei uf Sumiswaud u de uf Huttu isch bout worde, hets z Grünematt so ne Art Bahnhofstrass gä. Es isch zwar nid grad um Juweele u Peuzmäntu gange, aber Siuberschmuck für d Trachte het me scho übercho. D Firma Chrischte Bouungernähmig het im 2014 ds 125-Jahr-Jubiläum chönne fyre, u die Firma isch meh oder weniger denn wo d Ysebahn entstange. O d Poscht isch i de letschte Jahre no am Bahnhofplatz gsy.
Dr Franz Görres het Houz us Afrika u us andere tropische Gebiet importiert. Die Stämm sy de ab 1972 i die nöji Lagerhaue z Grünematt cho. Über dä Herr Görres chönnt me alleini es Buech schrybe. Monatelang syg är z Afrika uf Holzychouf gsy. Das Houz syg de per Schiff uf Rotterdam glieferet worde u är het dert müesse das Holz go
aafordere u wytertransportiere. So syg är o gäng wieder vo Grünematt uf Rotterdam gfahre. Wo das mit em Tropehouz isch i Verruef cho, het är d Erloubnis übercho ir DDR für d Schwyz Houz yzchoufe. D Tochter vo däm Görres het o verzeut, dass är einisch mit dem Ochse-Wirt Augsburger uf Kanada syg ga Houz choufe. Gäge Schluss zue, wo me Tropehouz ir Schwyz nümme het chönne verchoufe, het är o mit Eiche-Furnierwar ghandlet.
1923 het o die landwirtschaftlichi Gnosseschaft am Bahnhofplatz es Lagerhus mit Verchouf la boue. Zwo Generatione Lüthi hei d Gnosseschaft gfüehrt, zersch dr Vater Johann Friedrich Lüthi, wo im 1961 gstorbe isch u när dr Suhn Otto Lüthi. Wo är de 1991 isch pensioniert worde, isch d Filiale zueta worde. Z Grünematt isch aber sit mindeschtens 1630 e Mühli u e Saagi amene nöie Sagibach gloffe. Das isch aktekundig, wüu me speter sech nümme het chönne einige über dä Bach u d Bärner Regierig das het müsse gricht-lich regle. Sit 1871 ghört d Saagi dr Familie Lerch, wo vorhär
e Saagi in Öschebach het gha. D Mühli gits hüt nüm. 1906 isch sogar scho es Bahnhof-Reschtu ufgange. Lang het e Familie Joss uf dere Wirtschaft gschaffet. «Dr Blau Aff» isch e bekannti Bar gsy.