Raufli - oder «Ranflüh» wies genau heisst - isch e spezieue Ort. Hüt isch die Ortschaft teilt zwüsche de Gmeinde Rüderswiu u Lützuflüeh. Dass Raufli im Mittuauter e wichtige Roue het gspiut, wüsse hüt lang nümme aui. Raufli isch i dere Zyt so ne Art Houptort vom Ämmitau gsy. Mir geit drvo us, dass die Ortschaft scho vo de Alemanne isch gründet worde. Zersch mau erwähnt isch Raufli im Zinsbuch vo de Grafe vo Kyburg usem Jahr 1250. Me weiss o, dass ds Landgricht Raufli eine vo de siebe Bluetgrichtsbezirk vor Landgrafschaft Burgund isch gsy. Ds Chünigrych Burgund het so abem Jahr 850 bis i ds Jahr 1033 existiert. Bluetgricht het me däm gseit, wüu me o het chönne Todesurteil usspräche. Dr Gauge vo Raufli isch im Than gstange u dä isch bis i ds Jahr 1798 brucht worde. D Herrschaft Raufli het o geng ume dr Bsitzer gwächslet: D Kyburger Herre hei um ds Jahr 1300 Gäut brucht u hei die Herrschaft de Habsburger verchouft. Im Jahr 1408 het de Bärn die Herrschaft übernoo, u Bärn het dert o es Gricht gha. Scho im Jahr 1387 hets z Raufli übrigens e Wirtschaft gä u zwar e Tawärne; auso eini, wo het dörfe warmi u chauti Spyse verchoufe. Sehr früech fingt me o Hywise ufne Gärberei, e Mühli und zwo Schmitte. 1408 het Bärn bim Chouf vo Trachsuwaud das ganze Gebiet nöi ufteilt. Raufli isch aber ds Zäntrum vom Ämmitau blibe. Wichtig sy d Grichtstage gsy, wo dr Landvogt Fäu beurteut het. O d Landmanne vom Ämmitau sy uf Raufli cho u hei dert über d Politik diskutiert, Bärn het regumässig bi Sachfrage d Landlüt um d Meinig gfragt. I dr Zyt vo 1500 bis 1550 weiss me vo 50 Vorlage, wo z Raufli sy debattiert worde. 1653 isch aber de Raufli mit Bärn i Konflikt cho. Im «Bäre» isch dr Wirt Lienhard Glanzmann eine vo de yfrigschte Gägner vo Bärn gsy. Im Wirtshus isch ghetzt worde gäge d Herre vo Bärn. Das Ganze het de zum Burechrieg gfüehrt. Nachem verlorne Chrieg isch dr Glanzmann de mitem Tod bestraft worde. Ds Dörfli Raufli het um 1580 ume mit dr Dreifäuderwirtschaft ufghört u het ds Land uf em Dorfbärg verteilt. Das isch Land gsy, wo gmeinsam isch bewirtschaftet worde. Sit 1598 het Raufli o dr Schache dörfe bruuche, dä het dr Herrschaft Trachsuwaud ghört. Schnäu sy die erschte arme Lüt dert ga sidle. Im Jahr 1704 het me de das Land im Schache o zwüsche Rüderschwiu u Lützuflüe ufteilt. Drum het me 1889, wo me die ganze Gmeinsgränze het aapasst, z Raufli unger e richtige «Flicketeppich» müesse bereinige - das het e chly z tüe gä.