Im letschte Bytrag hanech ja verzeut, dass sech dr Ramseischache im Louf vor Zyt zumene Gwärbzäntrum het entwicklet. Im Jahr 2000 het d Zimmerei Kühni dert e Liegeschafte überno u denn d Firma vom Oberfrittebach uf Ramsei züglet. Dert het si sech prächtig chönne entwickle u isch hüt eini vo de gröschte Zimmereie ir Schwyz.
Ramsei isch aber natürlech o ir ganze Schwyz bekannt worde dür d Gründig vor Obschtwy-Verwärtig. 1910 isch die Gnosseschaft gründet worde. Die ganzi Sach isch im Novämber 1905 i ds Roue cho. Dennzumale het me gmerkt, dass me fasch aues Obscht vor Schwyz i ds Ussland verschickt u de drfür us Italie u Frankrych Wy bezieht. Warum isch niemer ir Schwyz ir Laag, säuber us Öpfu u Bire Moscht z mache? I dene Jahr isch no hüüfe Obscht zu tröchnete Schnitz verarbeitet worde, wo aber gäng wie schwieriger sy z verchoufe gsy. Die wichtigschte Gründer sy dr Fritz Oberli vo Ramsei u dr Johann Bärtschi vor Boumschueu Waldhuus gsy. 1914 het d Firma ar Landes- ussteuig z Bärn die höchschti Uszeichig übercho!
Im Buech über Lüzuflüeh wird o e Artiku sy über d Poschtgschicht. Dert isch mir ufgaue, dass es fasch nume Stämple git vor Bahnposcht «Ramsei?–?
Sumiswald?–?Huttwil?–?Bahn». Stämple vor Poscht Ramsei hingäge sy säute.
No am Aafang vor Suecherei bin i ir Ortschaft Grüenematt. So wies usgseht, isch die Ortschaft entstange us dr Mühli u dr Saagi, wos mindeschtens sit 1600 git. Hie isch rächt viu Materiau da, wüu dr Müer u der Sager über lengeri Zyt mitem Bsitzer vom Heimet Adubode um d Wasserrächt hei zangget. Am nördliche Ufer vor Grüene isch ds Dorf offesichtlich nid vor 1600 entstange. D Grüene isch ja d Gränze zwüsche Trachsuwaud u Brandis gsy. Vermuetlech isch das dr Grund, warum me nid viu fingt. I vermuete, dass ersch mitem Chouf vor Herrschaft Brandis dür Bärn «Läbe» i die Sach isch cho! D Mühli hets vermuetlech sit 1660 gää, wüu im 1670 dr Staat Bärn het d Wasserrächt müesse regle. D Grüene het vermuetlech nie gnue Wasser gha für au die Gwärb, wo nach 1550 sy entstange.
Um 1800 isch o z Grünematt Gwärb gründet worde (Gasthof, Ziegelei, Transport, Schnyder u Schuhmacher). Ab 1900 isch de dr Geissbühler mit sim Trachteschmuck berüehmt worde.
Ueche gägem Bänzebärg hets Einzuhöf gä, wo scho i de erschte Urbare vo Trachsuwaud u vom Chloschter Trueb z finge sy. I de 1890er-Jahr sy dert obe d Gränze zwüsche Lützuflüeh, Rüderschwiu, Trachsuwaud u Louperschwiu verschobe worde – drum isch die Sach kompliziert.