Anmelden
Wi d Evangelischte uf Kanzle sy cho

Itze chöme mir zunere Gschicht, woni zersch nid ha wöue gloube, aber sie stimmt tatsächlech. 1937 het me d Chiuche renoviert. Zu dr Verziehrig vor nöije Kanzle gits e interessanti Gschicht: Dr Biudhouer Kunz us Züri schrybt nämlech, dass är z Signou im Pfarrhus siner Muschter heig müesse zeige. Die vier evangelische Symbou syge vorgseh gsy u dr Kunz het Zeichnige unes Muster drby gha. Wo är dert syg gsy, heig du einisch eine vo dene Manne gseit, dass pass ihm nid, uf die Kanzle müess e Säämaa durf, u dä müess so u so usgseh. U drzue müess hinger no es Burehuus druf, wo dä genau beschribe het.

Dr Biudhouer Kunz isch de unsicher gsy, was är söu säge. Dr Pfarrer Monjon heig du aber gseit, d Sitzig syg fertig. Dr Kunz het däicht, är heig die Reis vo Züri uf Signou für nüt gmacht.Aber dr Pfarrer het ihm du es Zeiche gää, är söu de wieder cho, we die Herre furt syge. Wo dr Kunz zum zwöite Mau isch yche gange, isch no dr Pfarrer dert gsy aber nüm au Manne. Dr Pfarrer het ihm de gseit, uf d Kanzle chöme die vier evangelische Symbou – fertig.

Im Archiv hani de gseh, dass e Buur uf dr Mutte 1930 es Testamänt het gmacht, dass är dr Chiuchgmein Signou 1000 Franke vermachi, we si bis Ändi 1936 e nöij Kanzle aaschaffi. Dummerwys hei sis aber nid fertig brunge, bis Ändi 1936 das z mache. Sie hei müesse d Nachkomme frage, ob si mit dere Verlängerig yverstange wäre. Die hei zuegseit, aber hei drfür Mitsprach wöue wägem Motiv. Die Erbe hei nüt angersch wöue, aus ihre verstorbnig Vater uf dere Kanzle zeige. Das het aber dr Boukommission nid passt. 

Schlussändlich het d Chiuche de Erbe das Gäut mit «Zins u Zinseszins» umegää – aber am Biud-houer si Lohn nümme chönne zale. Dr Notar Keller us Langnou het de am «Herrn Bundesrat Rudolf Minger, lieber Freund» uf Bärn gschribe, öb me nid usemene Fonds die 1200 Franke de Signouer chönn gää. Dr Fründ Minger het das Gsuech sim Fründ Bundesrat Etter gää u dä het de us der «Gleyre-Stiftig» das Gäut locker gmacht. So sy die vier Evangelische doch no uf Signou cho.

17.10.2019 :: Hans Minder, Lokalhistoriker

Weitere Artikel

Es Söichopf choche, het veiechly z tüe gä
Vo früecher: Fleischsuppe oder Brüehi het me im 18. Jahrhundert i jedere guete Chuchi gäng ufem...
 
I chume wider zrügg uf ds Choch-buech usem Jahr 1749. I has nämlech die Wuche...
 
Märite het me üblicherwys nume i de Stedt kennt. Langnou isch e Usnahm! Aber Langnou isch...
Wie dr «Löie» zu sim Name isch cho
I ha scho am letschte Mau öppis über die aagschribene Hüser gseit. So e Wirtschaft...
12345678
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr