Hüt verzeuen ech vomene höch- dekorierte Maa: Dr Robert Stucker. Är isch 1863 z Grüenematt gebore und zwar aus einzigs Ching vom Dorflehrer Stucker. Wo är isch uf d Wäut cho, sy siner Eutere scho ganzi 17 Jahr ghürate gsy. D Mueter isch e rychi Buretochter gsy, e Iseli vom Pfaffebode. Dr Robert het e solidi u gueti Usbiudig aus Lehrer übercho, isch nächär ga studiere u het z London sogar no dr Dr. phil. gmacht. 1888 het är e Steu gfunge z Athen, wo är aus Privatlehrer für rychi Grieche het gschaffet. Nach zwöine Jahr het ne de dr Chünig vo Griecheland aagsteut aus Lehrer für siner Ching. Im Jahr 1902 het är dr Titu vomene «chünigliche Chammerheer» übercho.
Siner Beziehige zum Chünig Georg I vo Griecheland sy sehr guet gsy u dä het ne gäng ume aus Sonderbotschafter i ds Usland gschickt.
So het är d Herrscher vo Russland, vom Osmanische Rych, vo Dänemark, vo Grossbritannie u vo Dütschland lehre kenne. Die hei ihn gschetzt u ihm Orde gschänkt. Z Äthiopie het är dr Cheiser Menelik II gkennt. Dr Sultan vor Türkei heig am Stu-cker dr Titu vomene «Pascha» gä. Är syg dr einzig Chrischt gsy, wo dä Titu je heig überchoo!
Dr Papscht z Rom het dr reformiert Stucker sogar zum Zeremoniemeischter vom Vatikan ernennt. Mitem Usbruch vom Erschte Wäutchrieg isch de dr Stucker o uf London zoge, wüu z Griecheland dr Chünig het gwächslet. 1940 isch dr Baron Robert Stucker de z Athen gstorbe.
I überchume gägewärtig gäng ume nöji Gschichte vo de aute Lützuflüeher. Zum Byspiu das Müeti, wo es schwarzes Velo heig müesse choufe. Me chönn ja nie wüsse, wenn me i ds Leid chömm. Früecher isch es klar gsy, we öpper gstorbe isch,
muess me e gwüssi Zyt schwarz aagleit sy. U de es rots Velo?
Das gieng natürlech nid.
Viu Lüt z Grüenematt hei o Übernäme gha. «Schwarte Housi» het sech nach dr Pensionierig uf em Bahnhofplatz es Huus la boue, aber o viu Burelüt het me nachem Hofname gkennt u nid nachem Familiename.