Ds Chorgricht vo Sumiswaud het sech im Jänner 1799 a dr Elisabeth Schütz agnoo, wo z Madiswiu het gwohnt u wie si het gseit vo dr Allmacht Gottes schwanger syg. Ds Chorgricht het de dr Peter Sommer u dr Christe Hirsbrunner uf Madiswiu gschickt, für «die Schütz scharf z examinieren». E Wuche speter, am 27. Jäner, hei die zwe brichtet, was si usebrunge hei: Die Frou bharri druf, dass si vo dr «Allmacht Gottes» schwanger syg. Si heig o no verzeut, dass ihri Schwangerschaft chürzer wärdi sy aus normau. Füecher het si ja gseit, si syg sitem Verena-Tag, auso am 1. Septämber, schwanger. Bi dere zwöite Befragig im Jäner 1799 het si gseit, dass sie i 11 Wuche wärdi «darniederkommen» - die Schwangerschaft wäri auso nume öppe sächs Monet gange. Ds Chorgricht Sumiswaud het de bschlosse, die Frou söu «auf den mondrigen Tag» uf Sumiswaud ghout wärde. Dr Uftrag, die Elisabeth Schütz ga z reiche, hei dr Peter Sommer u dr Andreas Grundbacher übercho. Si isch de im «Spithal» z Sumiswaud yquartiert worde, wo denn meh es Schloss isch gsy. Für meh usezfinge über d Vaterschaft het me die schwangere Froue viu grad während dr eigentleche Geburt no einisch befragt - das gseht me o i angerne Fäu. Me het äue däicht, dass die Froue vor luter Wehe chly ender säge, wär dr Vater syg. So sy ömu am 10. Horner drei Manne vom Chorgricht - im Protokou isch vo «Genisstmänner» d Red - i ds Spittu ueche, wüe si ghört heige, es chönnt mit dr Geburt losgah. Nöis erfahre hei si nid. Wo aber die drei Manne ume syge dusse gsy, heig d Elisabeth Schütz ar Frou gseit: wo bi ihre inne syg gsy: «ein Engel habe ihr beyde Knaben aus ihrem Leibe genommen, und auf Gottes Stuhl geführt.» Nach dere Mäudig het de dr Distriktspresidänt beschlosse, dr Schärer u d Hebamme söue die Frou «visitieren». Usegfunge hei die beide de, dass es ke Geburt heig gä u dass die Frou offebar gar nie schwanger isch gsy! Nach dere Mäudig isch die Frou i Gfangenschaft gsetzt worde, wo si i dr Befragig aus het zuegä. Si heig Chuder - auso e Art Wulle us Line - ufe Buch bunge, dass es eso usgseht, wie si schwanger wär. Nid ganz klar isch, warum si das gmacht het. Aber für ds Chorgricht isch die Sach erlediget, gsy wüu si ja nid schwanger isch gsy.