«Berner Tagespost» het am 20. Jäner 1871 gmäudet, dass d Gmein Flüehli bir letsche Aupzählig vom Bund die meischte Aupe im Äntlibuech u Ämmitau heig gha. Es syge nämlich 70 Aup-Betriebe vorhande u dert heigs denn 1085 Chüe, 928 Guschti, 267 Ross, 2650 Schafe u de no 920 Geisse gha!
Doch gömer einisch i d Region um Grosshöchstette. Was isch dert passiert? I sueche nid direkt Grosshöchstette wüu die Ortschaft früecher het Höchstette gheisse u nes no meh Höchstette ir Schwyz git. Zäziwiu gits hingäge nume eis ir Schwyz u drum fani grad hie a: ersch im Jahr 1832 isch Zäziwiu z erschmau i eini vo dene Zytige cho, wo me itz digitau cha läse. Im Zämehang mit de Pfarrlöhn isch denn beschlosse worde, dass o d Häufer (hüt würde me Vikar säge) e Lohnerhöchig z guet heige. Dr Grossrat Küpfer vo Höchstette het dert no betont, dass me de o z Zäziwiu no Häufer heig. Dr Grossrat het de beschlosse, dass Zäziwiu u Wase dr glych Häuferlohn überchöm, nämlech 1000 helvetischi Franke pro Jahr.
Am 27. Juni 1841 isch im Thuner Wucheblatt gstange, dass am 14. Ougschte ds Amt Schlosswil im Gaschthof z Zäziwiu es Heimet in Mühleseile löi la versteigere. Es isch dert um ne Konkursfau vomene Johann Bieri gange. Das Heimet bestöng useme Burehuus u öppe 22 Jucherte Land.
I dr «Gazette du simplon» vom 22. Juli 1846 isch de wieder brichtet worde übernes Brandunglück in Zäziwiu. Es Huus, wo vo vier arme Familie syg bewohnt worde, syg abbrönnt.
Interessanterwys isch i de hiesige Zytige vo däm Brand nüt gstange. Die Gazette du Simplon isch z Sion usecho. Z La Neuveville isch am 8. u 10. Oktober 1875 Wyläset gsy. Zu däm Aalass het me vo dr Jura-Bern-Luzern-Bahn vergünschtigeti Billett übercho. Vo Zäziwiu uf La Neuveville het so es Billie äntwäder ir Zwöite Klass 5 Franke u ir Dritte Klass nume 3 Franken koschtet. Ir Ertsche Klass hets kener settigi Aktione gä, aber vo dene Herrschafte hei sech die meischte öppe dr Wy la hei transportiere.
Ir glyche Zytig isch es Inserat gsy vonere Apothek z Biel, wo Kokain verchouft het. Das syg guet gäge Hau- u Lungechrankheite, Närvegschichte u Magelyde. I ha us dere Zyt o scho es Inserat gseh vor Apothek Mosimaa z Langnou, wo äbefaus Kokain verchouft het.