Anmelden
Im Niedermattgrabe isch es so wytergange

Im Niedermattgrabe bi Signou sy aube zwöi Heimet gsy. Das hanech scho imene früechere Bytrag brichtet. No hüt hets zwöi Burehüser. Ds Heimet vo de Erbe Dällebach isch 1679 zum Nachbarsheimet cho. 

D Witwe Dällebach u ihri Tochter hei aber im Niedermattgrabe dörfe blibe, zäme mit em chränkleche Suhn, wo dä Hof scho wäge sire Gsundheit gar nid hät chönne übernäh. 

Die Dällebachs sy scho um ds Jahr 1500 e wichtegi Familie gsy z Signou. Ganz mängs Ehrenamt het die Familie gfüehrt.
Unger angerem sy die erschte Brüggvögt us dr Familie Dällebach cho. Die meischte Güeter vor Familie sy uf Hälischwang gsy. Dert gits no hüt dr Ort Dällenbach oder Tällebach. Die Lüt sy Bürger vo Signou, Louperswiu u Rüederswiu gsy. Guet, die vo Louperschwiu sy hüt usgstorbe, die letschte Dällebachs vo dert sy um ds Jahr 1720 uf Pennsylvania usgwanderet. Im Buech über die Uswanderig steit, dass dert vo dene Louperschwiler sogar öpper i de Chriege gäge d Indianer syg um ds Läbe cho. 

Im letschte «Vo früecher» hani o brichtet, dass ds Land aube isch gwässeret worde. Die Wassergräbe sy o vo dr Sagi brucht worde. Uf au Fäu isch abgmacht gsy, dass dr Sager vo Schüpbach das Wasser dörf nutze, är müess aber pro Jahr zwe Trämmle gratis sage. Drzue isch no vermerkt gsy, dass dr Buur vom Niedermattgrabe die zwe Sager, wo die Trämmle dürelöh, müess verpflege. Ds Heimet im Niedermattgrabe het 1679 meh oder weniger ds glyche Land umfasst, wie hüt no. Nume im Jahr 1860 isch o dert no es Stückli furtcho, wüu me het wöue e Ysebahn boue. 

1698 isch de dr Hof i die -nächschti Generation Mosimaa
cho u 1730 wieder i die nächschti.
Die Mosimaas sy rych worde, jedefaus steit im Nachlassvertrag, dass die beide Burehüser im Niedermattgrabe vor Churzem nöi syge bout worde. Dr jüngscht Suhn, Christian, är isch ersch grad 22-jährig gsy, het ds Heimet übernoh u 1781 het är de o no dr Hof im Hälischwang chönne chouffe. 

Wo är im 1791 isch gstorbe, het dr Hof im Niedermattgrabe si Tochter übercho, nid dr Suhn. So sy Haudimaas Eigetümer worde. Si hei aber kener Nachkomme gha u d Witwe het 1844 die Sach a d Familie Boumgartner verchouft, wo us Rüederswiu isch cho. Dr Spycher isch sehr aut, är isch mit 1638 datiert.


05.09.2019 :: Hans Minder, Lokalhistoriker

Weitere Artikel

 
Uf Schwarzenegg ir Gmein Trachsuwaud het 1653 dr Daniel Rothebüehl gläbt. Er isch eine vo...
 
Im Händschegrabe geits de hingere bis uf ds Sürisguet ueche. Vo dert hani für ds...
 
Chramershus isch ds gschäftleche Zäntrum vo Trachsuwaud gsy. Mir hei ganz Hüfe...
 
1680 isch de e Frou, d Margreth Steck, Wirti im «Bäre» gsy. Die het vor ds...
12345678
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr