Anmelden
Die längi Gschicht vom Hälischwang

Bi mire Forschig für ds Buech über Signou, luegeni natürlech nid nume d Gschicht vom Gwärb aa. Wichtig sy o d Buregüeter. Die grosse Höf hei e enormi Bedütig gha für d Gmein. Sie hei Lüt beschäftigt u hei Stüre u Abgabe zaut. Die Bure, wo Bsitzer vo dene Höf sy gsy, hei o politisch öppis z säge gha. Dr Landvogt het die gäng wieder ygsetzt für d Verwautig u für ds Vormundschaftswäse. I lise öppe, dass die Bure mängisch drei bis vier Vormundschafte glychzitig hei gha. De isch es de vorcho, dass si dr Gmein hei Rächnig gsteut, we si i ds Wäutsche hingere hei müesse reise, für are Signouer Witwe es Problem z löse. Nid öppe, dass die Waadtländer das arme Froueli no uf Signou heischicki! Nume das nid! 

Aus Byspiu, tue nech d Gschicht vo eim Hof chly gneuer verzeue: Es isch dr Hof ir Hälischwang, wo hüt ufteilt isch u Mosimanns u Kipfers ghört. 

Die früechschte Ungerlange woni im Momänt ha, sy von 1635. Dennzumale isch das Guet «Heydischwand» im Bsitz vo de Gebrüeder Peter u Bänz Dällebach gsy. Die Dällebachs ghöre zu de eutischte Bürger vo Signou. Si hei scho um 1550 Ämter gha. Zum Byspiu sy si Brüggvogt gsy. Das isch dä gsy, wo dr Zou uf dr Ämmebrügg z Schüpbach het yzoge. 

Für ds Guet «Heydischwand» hei si aui Jahr am Schloss Signou müesse eis Pfung u vier Schilling i bar abliefere. Das isch nid viu gsy. Dr Hof isch aber dennzumale no rächt ufteilt gsy. Drzue hei einzelni Stückli Land, Weid u Waud ghört, bis ueche ufe Reckebärg. Drnäbe hei si no müesse dr Getreidezähnte zahle, aber das het der Pfarrer vo Signou übercho – nid ds Schloss. 

1781 het de dä Hof amene Hans Haldimann ghört, zäme mit de Erbe vom Ueli Jänni us Eggiwiu. Die hei e Chöifer gsuecht u dr Chrischte Mosimann vom Niedermattgrabe het dä Hof kouft. Denn het das Heimet scho Hälischwang gheisse. 

Im Choufvertrag isch gstange, dass zu däm Heimet ds Burehuus u drumum sächs Maad Acherland ghöri. Wyter heigs no chly usserhaub es Stück Weidland miteme Schürli für zwo Chüe Sömmerig u Winterig. U de heige no zwöi Stück Waud im Buchizgrabe u im Fuhreholz drzue ghört. Dr Mosimann het für dä Hof 5050 Bärnischi Pfung müesse zahle. Das wäre öppe so 200’000 Franke. Das tönt nid nach viu, aber dennzumale sy Liegeschafte viu günschtiger gsy weder hüt.

11.07.2019 :: Hans Minder, Lokalhistoriker

Weitere Artikel

Wo dr Vater zwe Tag nüt gässe het
Vo früecher: Wieni i mim letschte Bytrag ha gschribe, wotti über ds Ässe u Treiche schrybe. Zum Byspiu...
Was bi üsne Vorfahre isch ufe Tisch cho
I wirde das Jahr einisch über öppis brichte, wo aui intressiert, nämlich ds...
 
Die beide Höf Aesch u vorder Liechtgut sy urschprünglich eis Heimet gsy u hei zur...
Vom Gärber- u  Blattmacher-Gwärb
Ir Gmein Trachsuwaud sy mir z hingerscht im Grabe aachoo, nämlech im Liechtguetgrabe. Dert, wo...
12345678
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr