Anmelden
Me het bleichet, bis d Ysebahn isch cho

Me het bleichet, bis
d Ysebahn isch cho

 

Z Signou hets ja aube e Bleichi gä. Im 19. Jahrhundert hets dert techneschi Fortschritte gäh: D Tüecher het me wysser chönne mache, we me se mit Javel-Wasser het behandlet. Die früsch gwobene Tüecher sy ir Neechi vo Wasser ufere Matte ufgspannt worde u de gäng gnetzt u mit Louge oder äbe Javel-Wasser behandlet worde. Statt häubrun u grau sy de die Linetüecher wyss worde. 

Mitem Bleiche isch es z Signou äue fertig gsy, wo d Ysebahn isch cho. Die isch nämlich z mitts übere Bleichiplatz vo Schüpbach bout worde. U was nützt aues bleiche, we d Dampflocki chunnt mit Ruess u Dräck? 

1850 syg die ganzi Färberei abbrönnt. Dr Niklous Schüpbach, wo denn isch Chef gsy, het de 1853 sine Brüeder die ganzi Sach verchouft. Schlussändlich isch aber dr Bendicht Schüpbach vo Vechige cho u het wytergfahre. Er het de o uf der angere Syte vor Strass es Ladegschäft bout. 1898 het er sine Sühn, Paul u Fritz Schüpbach, dr Betrieb übergäh. Dr Poul isch 1908 gstorbe u es schynt de o, dass die Sach ab denn zrügggfahre isch worde. 

Im Usserdorf gits es Huus, wo me cha säge, dass es Teu vor Ämmitauer Gschicht isch. Es isch d Dorfstrass 91. 1834 het der Schlosser Wiedmer es Stück Land kouft u druf si Schlosserei la boue. Dä Christian Wiedmer, gebore am 30. Jänner 1808, stammt usere Signouer Familie. Siner Vorfahre sy Schnyder vo Bruef gsy. Är het aber Schlosser glehrt, übrigens zersch z Basu u när z Louperswiu. 

Aber das isch nid dr Grund, wieso er o hüt no berüehmt isch. Er het nämlich e gueti Fädere gha. Er isch Chefredakter vom Ämmitauer Blatt z Langnou gsy u o Dichter. So stammt o d Ämmitauer Nationauhimmne vo ihm: «Niene geits so schön u luschtig, wie bi üs im Ämmitau». Aber im Ämmitau isch er denn vor auem aus Redakter bekannt gsy. D Signouer u d Langnouer sy, wie fasch ds ganze Oberämmitau, bi dr Radikale Partei gsy. Dr Wiedmer het i sine Artikle bös gsprützt gäge die Konser-vative u de natürlech o gäge d Pfärrer, bsungerbar dr Bitzius vo Lützuflüh hets im gar nid chönne. «Die Schwarzi Chräie
z Lützuflüh» heig är ihm gseit. 

 

 


13.06.2019 :: Hans Minder, Lokalhistoriker

Weitere Artikel

Signou isch dr Sitz vor Landvogtei gsy
Im Herbscht wird ir Gmein Signou e Gwärbusschtelig sy, u uf dä Aalass wetti mis Buech...
 
Vo Früecher: Vom Historische här gseh, isch es meh oder weniger e Zuefau, dass mir das nöie Jahr itz...
We dr Hobbychoch Schnägge achewörget
Ds ganze Jahr 2018 hani itze über ds Ässe u Treiche im Ämmitau gschribe. Afe einisch...
D Chochschueu het Apetit gmacht uf meh
Vo Früecher: Chochbüecher gits gäng wie meh. I de Buechhandlige gits äxtra e Egge, wo me die...
12345678
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr