Anmelden
Entschide, wo das es düregeit

Was wohäre ghört, ja das het scho vor Jahrhunderte intressiert. U scho früecher hets öppe Mau es Gstürm gä, wäm wele Acher oder weli Weid ghört. 

Ds schwyzerdütsche Wort «Scheid» isch i settigne Fäu hüfig grad mehrfach brucht worde. I dr authochdütsche Sprach hets grad mehreri Wörter gä, wo d Wurzle vo «Scheide» biude: «sceidan», «scidon» u «sceid». Zämegfass bedüte die trenne, abgränze aber o entscheide. Brucht worde isch aber nid nume «Scheid», sondern o «Schied» – us dene authochdütsche Wörter isch auso o ds hochdütsche «Schiedsgericht» entstange. Für d Ortsnäme heisst das auso, dass zersch d Frag, wo das d Gränze düre geit, isch entschide worde u när o grad isch usgschide worde. 

Es typisches Byspiu isch ds Scheidgrätli. Dä Grat ar Schratteflueh macht Gränze zwüsche de Gmeinde Flüehli u Äschlismatt-Marbach. 

Sehr guet beleit sy die drü -Heimet Scheidegg i dr Gmein Rüegsou. Imene Dokumänt usem Jahr 1311 steit «Scheideca». Scho sehr früech hets dert offebar mehreri Hüser gä, uf au Fäu isch bereits sächs Jahr speter das notiert worde: «in bono dicto Niderscheideg, in parrochia de Ruexbach sito» – es Guet wome Niederscheidegg seit ir Gmein Rüegsou. Die hütegi Version Scheidegg isch de bereits im Jahr 1380 imene Urbar notiert worde – die hütegi Schrybwys isch auso scho 640 Jahr aut. 

Ähnlech dörfti dr Fau bi de Aupe u Heimet Scheidzuun im Schangnou lige. Die meischte Hüser liege uf Schangnouer Bode, die oberschte aber ir Gmein Eriz. D Gränze macht hüt dr Schwarzbach. 

Müglech isch aber o, das bim Scheidzuun ds Veh im Herbst isch teilt worde; zum Byspiu für ne Schafscheid. 

O angerne Orte isch entschide worde, d Gränze amene Bach na z mache. Eso isch dr Ortsname Scheidbach, äbefaus im Schangnou, entstange. Chly weschtlech vom Heimet, wo eso heisst, verlouft no hüt d Gränze zur Gmein Eggiwiu. E Scheidbach macht wyter o d Gränze zwüsche Flüehli u Giswil. Dä entspringt ungerem guet 1700 Meter höche Wasserspitz u louft de Richtig Norde.



16.01.2020 :: Bruno Zürcher

Weitere Artikel

Ört u Näme: Was wohäre ghört, ja das het scho vor Jahrhunderte intressiert. U scho früecher hets...
Ds Söili giut aus Symbou vom Glück. Scho sit Jahrtuusige wärde Söi ghaute, o...
Ort u Näme: Bekanntlech isch dr Jesus nid im Ämmitau oder Äntlibuech uf d Wäut cho. We das junge...
Ort u Nähe: Ds Eriz dörfti viune e Begriff sy. I ha aber nid gwüsst, dass es o im Gebiet vor...
Weme die ganzi Schwyz aaluegt, de gseht me, dass es ussert em Wigge bi üs, nume no zwe wyteri...
Dass «Bänzebärg» aus «Bärg vom Bänz» cha dütet...
Im letschte «Ört u Näme» hani vo de Ortsnäme mit «Bad»...
Ort u Näme: Euteri Ortsnäme, wo miteme «Q» aaföö sy ganz dünn gsäit. Das...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr