Anmelden
Wo mir no aui zäme katholisch sy gsy

500 Jahr isch es här, sit dr Martin Luther ar Chiuche vo Wittenberg siner These aagschlage het, wo er sini Meinig über die fautsche Vorstellige vor katholische Chiuche het gmacht. Dennzumale isch im Weschte vo Europa nume grad ei Chiuche die richtigi gsy: nämlich die römisch-katholischi. O aui Chiuchene im Ämmitau sy katholisch gsy u d Pfärrer Prieschter. 

Ygsetzt het die Prieschter dr Bsitzer vor Chiuche. I dr Regu sy das Chlöschter gsy oder dr Staat Bärn. I säutene Fäu hets o privati Bsitzer gha. Dr Bsitzer vor Chiuche het o dörfe d Zähnte yzieh. Si hei aber o müesse d Chiuech ungerhaute. 

D Chiuche vo Langnou het bis 1276 em Ritter Walter vo Aarwange ghört u dä het se de am Benediktinerchloschter Trueb gä. Vo denn aa isch Trueb verpflichtet gsy e Mönch aus «Lütprieschter» uf Langnou z schicke. O Louperschwiu het em Chloschter Trueb ghört. D Herre von Wartestei hei 1501 em Chloschter o no dr Spycherturm im Dorf gschänkt, dass si dert es Pfarrhuus chönne drus mache. No hüt gseht me däm Huus a, dass es uf emene Burghügu isch bout worde. 

Lützuflüeh het de Herre vo Brandis ghört u isch ersch nach dr Reformation 1607 i Bsitz vo Bärn cho. Röthebach het bis 1485 em Cluniazenserpriorat Rüeggisbärg ghört. Nächär hets bis 1528 zum Bsitz vom Chorherrestift Bärn ghört u mit der Reformation isch de Röthebach zum Staat Bärn cho. 

Signou isch Bsitz gsy vo de lokale Freiherre vo Signou. Die hei aber gäng ume Gäut brucht u d Chiucherächt verpfändet. Wo dr Johann vo Büre d Herrschaft a Bärn verchouft het, het Bärn de d Chiuecherächt bhaute. 

D Rächte vo Trachsuwaud het em Gschlächt Schweinsberg-Attinghuse ghört u isch de später zum Dütschritterorde vo Sumiswaud cho. 

D Abgabe a d Prieschter sy fasch nume Naturalie gsy: Höi, Chorn, Hüener u angere Züüg. Ganz wichtig isch dr Höizähnt gsy. Dä het me scho früech mit Bargäud müesse zahle. Das isch für e Buur ke schlächte Tusch gsy, wüu die Abgabe einisch sy feschtgleit worde u sech nie meh gänderet hei. Ds Gäut isch gäng weniger wärt worde u d Bure hei dür das weniger müesse zahle. Es isch de o so de Bsitzer vo dene Rächt gäng wieder es Problem gsy, e Prieschter z finge. De hei de öppe d Lüt reklamiert, dass si scho sit lengerer Zyt kei Prieschter me heige gseh. 

 

 


27.04.2017 :: Hans Minder, Lokalhistoriker
Meistgelesene Artikel
Käse aus dem tiefen Emmental für  Juden und Muslime in aller Welt
Gohl: Die Käserei Gohl AG hat eine neue Produktionslinie in Betrieb genommen. Damit stellt sie den...
Wie halten Sie es mit dem Warten? -Reagieren Sie genervt, wenn Sie am Skilift, am Postschalter oder...
Im Untergrund des Napfberglands
Neu gibts einen Geologischen Atlas für die ganze Napfregion.  Dieser kann unter anderem...
Die neue Hängebrücke eröffnet neue Wandermöglichkeiten
Flühli: Am Freitag wurde die Hängebrücke Chessiloch in Flühli nach einer Bauzeit von drei...
«Langnau ist ein guter Ort für die ersten Lebensjahre meines Sohnes»
SCL: Ben Maxwell, der 31-jährige Kanadier ist seit zwölf Saisons Profi-Eishockey-Spieler....
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr