Anmelden
Wo dr Vater zwe Tag nüt gässe het
Wo dr Vater zwe Tag nüt gässe het Vo früecher:

Wieni i mim letschte Bytrag ha gschribe, wotti über ds Ässe u Treiche schrybe. Zum Byspiu über die erschte nöie Pflanze us Amerika. Dass me d Härdöpfu zersch lieber em Tüüfu hät überlaa, weder e Röschti z mache, ghört da drzue. 

Aber natürlech chunnt o dr Gotthäuf mit sim Toufimau im «vo früecher» vor. Mi Mueter weiss hüt no z verzeue, dass si einisch bire Toufi so syge abgfüut worde, dass dr Vater ersch am Mittwuche wieder öppis heig achebrunge. I ha o Abrächnige vo Ufrichtine u Grebtässe gstudiert, für usezfinge, wo was isch uftischet worde. De isch uf einisch Konserviere ufcho, Ychoche, Sterilisiere u ­settigs. Das het z Läbe für d Chöchi eifacher gmacht. De sy uf einisch Itaujäner cho, u die hei Sache drby gha, wie Meis u Tomate.

I dere Zyt isch o ds Pasterisiere ufcho. Dr Louis Pasteur het 1864 usegfunge, dass d Bakterie nach emene churze Momänt, wo si z heiss überchöme, tot sy. Aber das isch nume churz e so gsy. Si Lösig: Me tuet die Vorrät ines Glas, tuet das Glas zue u erhitzt die Sach. De blibe die Läbensmittu lang hautbar. D Konsärvedose isch übrigens scho euter, die het me ir napoleonische Zyt erfunge. Dr Cheiser vo de Franzose het e Prys usglobt, für dä, wo Proviant für d Truppe länger chön hautbar mache. Dr Doseöffner isch ersch 1855 erfunge worde – vorhär het me die Dose miteme Bieli müsse uftue! Wider meh mit em Ämmitau z tüe het d Sänftube. Bis 1934 het o dr Hans Thomi si Sänf z Langethau i Steiguettöpf verchouft. Denn het är aber aus erschte uf dr Wäut dr Sänf i Alu-Tube ab­gfüut u so verchouft. Das isch dr gross Renner worde! Wäutwyt! Der Hans Thomi isch Bürger vo Oberburg gsy. Us wärbetechnische Gründ het är dr Name uf Thomy gänderet. 

Curry isch o öppis rächt Nöis. Das hei aber nid Tamile brunge, sondern dr Ueli Prager vom Mövepick mit sim «Riz Casimir» bekannt gmacht. Am beschte tüet dir mini Byträg  gäng churz vor em Ässe läse. De isch de dr Hunger, wos git, e chly besser z kontrolliere. E Guete! 


 

01.03.2018 :: Hans Minder, Lokalhistoriker
Meistgelesene Artikel
Auszeit: Zuerst eine Geschichte aus der Zeit der altchristlichen Wüstenväter, die uns helfen kann,...
Ort u Nähe: Ds Eriz dörfti viune e Begriff sy. I ha aber nid gwüsst, dass es o im Gebiet vor...
«Das ist nicht jedermanns Sache»
SCL Tigers: Nach zweimonatiger Verletzungspause gab Aaron Gagnon am Dienstag sein Comeback. Obwohl wieder fit,...
«Wir freuen uns, vor heimischem Publikum zu spielen»
Unihockey, Damen-WM: Am Samstag beginnt in Neuenburg die Unihockey-Weltmeisterschaft. Während neun Tagen spielen...
«Landschaftsschutz überwiegt  das wirtschaftliche Interesse»
Oberdiessbach: Die kantonale Baudirektion hiess eine Beschwerde gegen die Überbauung Chriseggle gut und...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr