Anmelden
Was bi üsne Vorfahre isch ufe Tisch cho
Was bi üsne Vorfahre isch ufe Tisch cho

I wirde das Jahr einisch über öppis brichte, wo aui intressiert, nämlich ds Ässe u Treiche. Das mache fasch aui, weme nid em Heilige Brueder Chlous wot Konkurränz mache. Dä heig ja nüt gässe u trouche. I weiss scho, zum Thema «Ässe u Treiche im Ämmitau» gits viu Literatur, auso Chochbüecher. Die sy aber meischtens über d Gotthäuf-Zyt u die Rezäpt hei de o so gluschtigi Näme wie «Ziberli-Hoger-Lisi-Filee» oder «Eisis-Visite-Brei». Nüt gäge das, aber mi het scho gäng intressiert, was eigentlech bi üsne Vorfahre, wo chly vorhär hei gläbt, isch ufe Tisch cho. Vor föifhundert Jahr uf au Fäu e ke Röschti u o ke Kafi – das het me denn no nid kennt. 

Was het me eigentlich gässe? Das isch gar nid so eifach z säge. Me cha nid eifach der «Tiptopf» vom Jahr 1100 choufe u de isch me informiert. Ds erschte bärnische Chochbuech isch ersch im Jahr 1832 erschine. Scho dert drinne gseht me, dass d Chuchi denn no angersch isch gsy aus hüt.  

Für usezfinge, was me no früecher het kochet, muess me i d Archiv ga luege, was dert erwähnt isch, mängisch isch es o e Zuefau, weme öppis cha belege. So sy o grad d Chorgrichtsmanuau e gueti Queue, fingt me doch dert so Yträg, wie einisch, wo sech zwee mit Stäcke hei aagriffe, wüu dr eint am angere het vorgworfe, er heig si Geiss zu ihm i Garte gschickt, das si ihm dr Chabis frässi. 

1620 sy zwe Bure wäge Sunndigs-Entheiligung verurteilt worde, wüu si am Sunndig hei Ärbsli tröschet, weiss me drum, dass me 1630 hieume Ärbsli aapflanzt u drmit o gässe het. Ärbssuppe mit Gnagi wär auso afe einisch müglech gsy. 

So wirdeni im Louf vo däm Jahr einisch ga luege, wie u was d Mönche im Chloschter Trueb ufem Täuer hei gha, was me im Mittuauter het gsäit u gsetzt u was drmit isch gmacht worde. Mir luege, wie e Brii isch gmacht worde, wärum es nid jede Tag het Brot gää, was me het chönne finge, wo vo säuber isch gwachse u was me het müesse probiere aazpflanze. Mir luege wie dr Adu uf sine Schlösser het gässe u wo dr Wyy isch härchoo. Dä hets unbedingt bruucht, wie hät süsch dr Prieschter ds Heilige Abendmau chönne fiire?  

15.02.2018 :: Hans Minder, Lokalhistoriker
Meistgelesene Artikel
«Love me tender, love me sweet, never let me go...», schmachtet Elvis dezent aus einem...
Zuerst möchte ich eine kurze Geschichte erzählen:  Ein Blinder und ein Lahmer...
Aeschbacher gewinnt erstmals das Bernisch-Kantonale in Münsingen
Schwingen: Matthias Aeschbacher heisst der souveräne Sieger des Bernisch-Kantonalen. Thomas Sempach...
Eishockey: n der 40. Hauptversammlung des SCL-Tigers-Fanclubs wurden diverse Neuerungen kommuniziert. Unter...
Dinosaurier im Miniformat in Gefahr
Wildtiere vor unserer Haustür: Zauneidechsen würden im Emmental und Entlebuch eigentlich gute Lebensräume finden, doch...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr