Anmelden
Wär isch äch nöime «Wäusch-Leie» gsy?
Vo Früecher: 1673 isch der Elias Gottier us Rougemont z Rüederswiu Bürger worde. 23 Batze hein ihm d Gmeinsvätter drfür abzwackt.
Er isch aus Handwärcher im Bomattschache gsy u im 1702 isch im Chorgricht vo Louperschwiu e Ytrag gmacht worde. Der Suhn Peter Gottier «Wäusch Leies Peter» het bire Ufrichti uf der Schwand ir Moosegg obe zviu Energie gha u het d Magd Elisi Stucker gschwängeret. «Wäusch-Leies» muess me übersetzte mit «der Elisas aus dem Welschland». Die Familie Gottier isch speter aus Zimmermaasdynaschtie bekannt worde. Das, wo mir hüt aus Ämmitauer Burehüser aaluege, isch o es Wärch vo de Gottier vo Rüederschwiu.
D Hertig sy e auti Rüederswiuer Familie. E ganzi Zylete vo Hertige us Rüederswiu sy im Burechrieg büesst worde, wüu si mitghoufe hei. Mir wüsse hüt o sicher, dass d Louperschwiuer Hertig u die vo Rüederswiu die glyche Lüt sy. Dr Heimatort isch o dert 1680 nachem damalige Wohnort entstange. Übere Hof Ungerfrittebach vo Hertigs het der Chrischt Rubi 1941 e Burehus-Chronik gschribe.
Über d Hubschmid vo Rüederswiu het dr Stefan Hubschmid sinersyts e grossi Arbeit geschribe, wo me ir Nationalbibliothek z Bärn cha uslehne.
Itz chöme mehr zu Jutzis. Die sy Handwärcher gsy. I ha unger de Vorfahre Schmiede, Schärer u Gärber gfunge. Meh weder 100 Jahr het d Gärbi i dr Ämmematt de Jutzi ghört. O angeri Gärbine im Ämmitau sy vo dere Familie gfüehrt worde.
Es ganz es grosses Kapitu sy d Kähr (Chär) vo Rüederswiu. Da isch scho inere Urkunde vo 1343 e Rudolf Kerro u si Frou, Tochter vom Peter vo Oenz, erwähnt. Sie hei dert imene Ehevertrag über ihrer Güeter z Raufli verhandlet. Der Stammhof im Ried het bis 1890 dere Familie ghört. Dr Ueli Chär im Ried isch im Burechrieg Fähndrich vo de Buretruppe gsy u isch z Oschtermundige u ds Herzogebuchsi drby gsy.
1633 het er es Buebli la toufe, wo Niklaus het gheisse. Dr Götti isch niemer gringersch aus dr Niklous Löiebärger gsy, wo äbe speter dr Burefüehrer isch gsy. Dr Chär isch aber nid ufghäicht worde. Die gnädige Herre sy äbe gnädig gsy – er het e Buess von 1200 Chrone müesse zale. Das isch e Riisebetrag gsy. Bis 1663 het er afe 660 Chrone zaut gha. Der Rat vo Bärn het ihm denn aber der Räschte vor Schuld erlaa.
Chärs hei speter gueti Beziehige zum Landvogt z Trachsuwaud gha. Meh weder einisch isch dr Landvogt eim vo de Ching Götti gsy. Dr Oswaud Chär isch 1759 im Uftrag vo de Gnädige Herre uf Dänemark greist, für dert Ross z choufe. 20 Hängschte het er dert usegläse u zrügg uf Bärn brunge. Die Gnädige Herre hei ne usgwäut, zäme mit eme Johann Lehmann vo Langnau, wüu er aus Rosskenner het goute.

02.03.2017 :: Hans Minder, Lokalhistoriker
Meistgelesene Artikel
«Love me tender, love me sweet, never let me go...», schmachtet Elvis dezent aus einem...
Zuerst möchte ich eine kurze Geschichte erzählen:  Ein Blinder und ein Lahmer...
Aeschbacher gewinnt erstmals das Bernisch-Kantonale in Münsingen
Schwingen: Matthias Aeschbacher heisst der souveräne Sieger des Bernisch-Kantonalen. Thomas Sempach...
Eishockey: n der 40. Hauptversammlung des SCL-Tigers-Fanclubs wurden diverse Neuerungen kommuniziert. Unter...
Dinosaurier im Miniformat in Gefahr
Wildtiere vor unserer Haustür: Zauneidechsen würden im Emmental und Entlebuch eigentlich gute Lebensräume finden, doch...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr