Anmelden
Wäge «Fischer» hani zwo Lösige ar Angle
Wäge «Fischer» hani zwo Lösige ar Angle Ört u Näme:

I bi siteme Zytli am luege, wohär äch zwe Ortsnäme mit «Fisch» chöme. Normalerwys hei settig öppis mit Fische z tüe; Byspiu fingt me öppe am Thuner- oder am Bielersee. 

Weme aber ufem Fischerhubu obe steit, de isch me wyt furt vomene See u vo Fische – aber d Ussicht isch glych super. Dä Ort liegt rund e Kilometer weschtlech vo dr Waudhüsere u isch quasi ds Vierländeregg vo de Gemeine Landiswiu, Arni, Oberthau u Louperswiu. 

Dä Name geit zrügg ufne Herr Fischer, wo dert gwohnt het. Ursprünglech het das Huus nämlech Ätzlischwandhubel gheisse u isch de speter zum Hubu vom Herr Fischer worde, äbe zum Fischershubu. Imene Choufvertrag vo 1880 steit de no «Fischer- oder Aetzlischwandhubel» – so heis de ömu sicher aui verstange. 

Im Gebiet vor «Wuche-Zytig» gits no es zwöits Huus, wo hie drzue passt. Das heisst churz u bündig «Fischer». Das Heimetli liegt guet e Kilometer nordöschtlech vo Sumiswaud – u o dert hets ke See u o ke Bach, wo für si Fischrychtum bekannt wär. 

Dr hüttig Bsitzer vo däm Huus het mir mau auti Dokumänt brunge, u i ha däicht, dass de irgendwo e Chöifer oder e Glöibiger uftouchi, wo Fischer heisst. Aber nobis. 

Klar isch, dass das Heimetli nid ewig «Fischer» het gheisse, sondern früecher «Mattstau», wie das hüt no bimene Heimet dert no dr Fau isch. «Matzstall» bi Sumiswaud wird bereits imene Urbar vo 1426 erwähnt. 

Aber warum heisst eis Huus de Fischer? Da isch mi Kolleg, dr Minder Hans, fündig worde. E früechere Bsitzer isch e Peter Gfeller gsy, u dä isch am 12. Ougschte 1838 gstorbe. Im Toteregischter vom Chiuchebuech steit: «Peter Gfeller, Ulrichs selig, Wittwer, Fischer, ob Löhli». Auso: Dä Maa isch im Huus obem Löhli gwohnt, das isch ds Huus, wome hüt «Fischer» seit u dä isch offebar Fischer gsy. 

Es git o hieumenang Ortsnäme mit «Fisch», wo de würklech öppis mit em Tier z tüe hei. Chly weschtlech vo Schangnou entspringt ds «Fischbächli», wo när wyter unger id Ämme louft. Dert isch d Bezeichnig entstange, wüus viu oder bsungers schöni Fische het gha. Dr Name vom Bächli isch de im Louf vor Zyt uf die Heimet obem Bächli übergange.  

Queue:

«Ortsnamenbuch des Kantons Bern», «Orts- und Flurnamen des Amtes Entlebuch», www.idiotikon.ch u wyteri. Aafrage: 034 409 40 05 oder zuercher@wochen-zeitung.ch



14.06.2018 :: Bruno Zürcher
Meistgelesene Artikel
Der Kirchturm wird nicht vermietet
Oberburg: An der Kirchgemeindeversammlung hatten die 56 erschienenen Stimmberechtigten über ein Gesuch...
Der Plan für die Räumung
Räbloch: Die Räumung des Räblochs verzögert sich. Nun ist klar, dass im Herbst die...
Es hat mehr junge Hausärzte – aber  insgesamt noch immer zu wenige
Konolfingen: Heute können sich mehr junge Ärzte vorstellen, in einer Hausarztpraxis tätig zu sein...
94 Hektaren Land wechseln den Besitzer
Oberburg: Wegen des Hochwasserschutzes müssen 94 Hektaren Land von 42 Besitzern umgelegt werden. Die...
«Die Wahl in die Top-Elf der Liga ist eine zusätzliche Motivationsspritze»
Fussball: Lia Wälti hat ihre erste Saison bei Arsenal hinter sich. Mit den Londonerinnen gewann sie den...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr