Anmelden
Verschideni Vögu u när es Dessär
Verschideni Vögu u när es Dessär

Es het im Buech o e ganzi Reihe vo Rezäpft für Gflügu. Nid so wie hüt, wos fasch nume no Poulet git. Im aute Bärn het me o no Fasane, Räbhüener, Güggle, Räckhouder-Vögu (Wachouderdrossle), Lerche, Tube, Schäpfe (Waldschnepfe), Gäns u Änte gässe. Sogar es Rezäpt, wie me e Wäutsche Hahn tüeg brate hani funge. Wüsst dir nid, was das für nes Tier isch? Das isch nüt angersch aus e Truthahn. 

Faus dir nech fraget, wie me ächt 1749 zu dene Zuetate isch cho, de hani hie no e Typ: im Lade z Raufli. 1760 isch dr Chrämer gstorbe u me het es Inventaar ufgnoo. Natürlich isch ds meischte Stoff gsy u Wärchzüg aber es het o angersch gha: Rys (da sy 100 Pfund im Vorrat gsy), rote u wysse Zucker, Änis, spanische Pfäffer (mir säge däm hüt Paprika), Pfäfferchörner, Safran, Kafi, Rosine, Mutschgetnuss u sogar grüene Tee! Vom Safran het dä Chrämer übrigens 62 Gramm am Lager gha. Dä het lut däm Inventar e Wärt vo 30 Batze gha. Das wäre umgrächnet i die hütegi Zyt öppe 150 Franke oder ds Gramm für 2,50 Franke – das isch sogar günschtiger aus hüt. Safran isch drum so tüür, wüu sehr viu Arbit dran isch u Arbit isch denzumale günschtig gsy, hüt aber sehr tüür.

So, itze wär doch no es guets Dessär nache. O das hets im Rezäptbüechli vo 1749. Afe einisch finge mir zimli mängs Rezäpt für Chüechli, wo me im Fett usbachet. Es het aber o Güetzi u viu Rezpäpt für Mandle. Die sy i dere Chuchi bsungerbar viu brucht worde. Öpfu hets o denn scho gää u drum hie afe einisch e so ne Art Öpfuchüechli: Me söu es paar Öpfu, wo nid grad gar suur syge, i dicki Schibe schnide u «das Gräutschi» usehoue. Inere Bratpfanne zimli viu Anke uslaa u de die Öpfuschibe drinn la brünlech wäre. We si guet sy, ase usenäh u mit Mandustifte verziehre. De chöme si in e Platte u uf e Tisch. Drzue gits e Sosse. Für die muess me Zucker, Zimet, Rosinli u es Glas Wyy ufchoche, am Schluss no einisch Zucker vom Zuckerstock schabe. Die Öpfuchüechi mit em gschabete Zucker verziere u derzu die Sosse gä. Mir kenne die Öpfuchüechli ja gäng no, mir tue se aber inere Eier-Mäu-Miuch-Mischisch ylege u de ir Fritöse usbache. Dä Teig het me aber o scho denn kennt. Er isch nämlich bi mehrere Rezäpt erwähnt, isch aber niene drinn. I go dervor us, dass so ne settige Zeit jedi Housfrou u jede Choch het kennt u mene drumm niene ufgschribe het. 

16.08.2018 :: Hans Minder, Lokalhistoriker
Meistgelesene Artikel
Kolumne:

 

Loïc In-Albon – einer der Lichtblicke in finsteren Zeiten der Tigers
SCL Tigers: Auch wenn die SCL Tigers derzeit resultatmässig schlechte Zeiten durchleben, gibt es doch auch...
Saison-Ende für Freimettigen
Eishockey, 2. Liga: Das wars mit dem Wunsch-Ziel: Playoff-Final. Für Freimettigen ist die Saison nach dem...
Kiesgrube Dicki: Gut 60 Prozent  sagen Ja zur Erweiterung
Hasle: Dass der Kiesabbau im Dicki erweitert werden soll, war an der Gemeindeversammlung unbestritten. Zu...
Wenn administrative Umwege zur neuen ARA-Brücke führen
Langnau: Die so genannte ARA-Brücke soll neu gebaut werden und zwar so, dass sie bei Hochwasser rasch...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr