Anmelden
No chly meh Wirtschaftsgschicht

Märite het me üblicherwys nume i de Stedt kennt. Langnou isch e Usnahm! Aber Langnou isch um 1500 näbe Bärn eini vo de gröschte Ortschafte im Kanton Bärn gsy. Die meischte früechere Wirtschafte sy vo Bärn bewiuiget worde u heisse drum no hüt «Bäre». 

Signou isch e Speziaufau: Dert hets gäng zwe Wirtschafte gha, dr Bäre u dr Turm. So wyt i hüt weiss, hei die zwo Beize ömu bis um 1750 bärnische Patrizier ghört u Lächewirte hei dert gwirtet. Im «Bäre» zum By-spiu isch vo 1662 aa e Niklous Herrmann Wirt gsy. Dä isch de speter z Signou ybürgeret worde, er isch vo Bowiu gsy. Eine vo sine Ur-Ur-Ur…-grossching isch dr Gründer vor «Wuche-Zytig». 

O im Truebschache hets e auti Wirtschaft, dr «Bäre», wo aber bis 1922 eigentlich uf Trueber Gmeinsgebiet isch gstange. Ersch denn isch dä Teil von Trub abtrennt worde u zur Gmein Truebschache cho. E zwöiti Wirtschaft isch ds Trueb-schache im Jahr 1872 bout worde, nämlech dr Gaschthof Bahnhof. Dr Bouherr het aagnoo, dass dr Bahnhof grad näme sire nöie Wirtschaft wärd cho. Dummerwis ische de die Strecki no e chly länger bout worde u dr Gaschthof Bahnhof isch wyt näbem Bahnhof gsy. Dr Wirt het drum
e nöie Name müesse sueche u sithär heisst dr «Bahnhof» «Hirsche». 

O d Gschicht vo de Wirtschafte vo Schangnou kenneni itze afe e chly. Ursprünglech hets nume ei Wirtschaft ghä, nämlech die uf em Waud. Das isch ursprünglech o ds Zäntrum vor Gmein gsy, o wes hüt ganz am Rand vor Gmein isch. Vor guet 200 Jahr het de d Gmein säuber im Dorf e nöie Wirtschaft la uftue, dr «Löie». Vorhär isch dert es Burehus gstange. 

Ds Chemmeribodebad u siner berüehmte Merängge isch e jüngeri Gschicht! 

I de Wirtschafte dennzumale isch houtsächlech trouche worde u zwar Wii. D Wirte hei i erschter Linie vo dämm gläbt. Usswärtigi Gescht u Durchreisendi hei o z Ässe übercho. Es het o Wirtschafte gää, wo zum Byspiu nüt Warms hei dörfe uftische. Dene Wirtschafte het me «Pinte-Wirtschafte» gseit u nid «Gaschthüser». Aber vermuetlich het ds Menü nid viu angesch usgseh aus das, wo me bi de Burelüt o hät übercho. Spyscharte us em Ämmitau vo 1750 oder euter hani jedefaus no nie eini gseh.


24.05.2018 :: Hans Minder, Lokalhistoriker
Meistgelesene Artikel
Wie halten Sie es mit dem Warten? -Reagieren Sie genervt, wenn Sie am Skilift, am Postschalter oder...
Es ist matchentscheidend für unser Leben, mit welchen Menschen wir uns umgeben. Haben wir...
Käse aus dem tiefen Emmental für  Juden und Muslime in aller Welt
Gohl: Die Käserei Gohl AG hat eine neue Produktionslinie in Betrieb genommen. Damit stellt sie den...
«Langnau ist ein guter Ort für die ersten Lebensjahre meines Sohnes»
SCL: Ben Maxwell, der 31-jährige Kanadier ist seit zwölf Saisons Profi-Eishockey-Spieler....
E Ämmitauer Spezialität sy die sogenannte «Frässbedli» gsy. Fasch i...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr