Anmelden
Mit «Rot» isch nid geng d Farb gmeint

I ha früecher scho einisch über Ortsnäme mit «Rot» gschribe, wo e Läser gfragt het, wäge dr Härkunf vom «Rothebüeu». 

I viune Fäu isch dr Härd namensgäbend gsy. Rötlech gfärbte Härd chunnt vomene höchere Yseghaut. Müglech isch wyter aber o, dass drmit trocheni Steue bezeichnet wärde, wo ds Gras im Summer schnäu brun wird – oder äbe rot. 

Me fingt e ganzi Zilete vo settigne «Rot»-Ortsnäme. Imene Dokumänt vom «Rötemoos», chly öschtlech vo Hütlige, steit no
usdrücklech «rötliche Erde». 

Sehr lang existiert scho d Bezeichnig «Roteflue». Die Flueh isch zwüschem Chemmeribode u em Schibegütsch. Ganz aut beleit isch natürlech o d «Rotache», wie das bi Bäch hüüfig dr Fau isch. U o dert dörfti die rötlechi Färbig tschuld sy. 

Aber äbe; es git o Usnahme. Die gö nid zrügg uf ds mittuauter-leche Wort für «Rot» – «rõt», sondern uf «rod». U das meint «rode» u ganz augemein «Land urbar mache». Viu vo dene Ortsnäme dörfte ire Ursprung vor meh aus tuusig Jahr ha. Vo däm här verwungerets nid, we d Schribwys scho früech vo «rod» uf «rot» isch umgänderet worde. Nume i de erschte Jahr sy ja d Spure vom Rode no z gseh. 

No originau «Rod» steit imene Dokumänt vo 1402 u gmeint isch es Gebiet ar Gränze von Oberburg u Burtlef. Bekannt isch dert d Wirtschaft Rothöchi. Ähnlech tönt «Rodacher» ir Gmein Hasli. Dr Name vo däm Acher, wo grad näb dr Chiesgruebe ligt, isch aber geng chly angersch gschribe worde: Näbscht «Rodacher» fingt me o «Roth-acher» u «Rotacher». E settige Acher gits o z Bigle u dert isch de 1558 no e angeri Variante gschribe worde: «Rottacher». 

Bis zrügg i ds 14. Jahrhundert isch wyter dr Wyler «Rot» zwüsche Bigle u Arnisagi beleit, wo si Ursprung o vom Rode het. Näbedranne gits no es paar Heimet, wo me «Chleerot» seit. Me chönnt auso meine, dass es dert viu Rotchlee gäbi. Aber nobis: Das isch eifach ds «chlyne Rot», näbem Wyler «Rot». 

Intressant isch o dr Ortsname «Grat» ir Gmein Dürreroth. Es git mehreri Hüser, wo eso heisse, aber nid aui si ufeme Grat obe. Im eutischte bekannte Beleg steit «Cuntz im Grod». Ds Wort «Grod» isch e Kollektivbiudig vo «rode» u meint auso «e grösseri Rodig».


 

20.06.2019 :: Bruno Zürcher
Meistgelesene Artikel
Letztes Mal, als ich die Kolumne über unser Grosskind Julian geschrieben habe, erhielt ich...
In der Bibel gibt es folgende wunderbare Geschichte. Da hat jemand 100 Schafe. Eines macht nicht...
Die SCL Tigers sollen wirtschaftlich auf mehreren Beinen stehen
Langnau: Nebst dem geplanten zweiten Eisfeld bei der Ilfishalle sind weitere Projekte in der Pipeline: ein...
«Mehr aus dem Geld herausholen»
Langnau: Die SCL Tigers zählen zu den wenigen Hockeyclubs der höchsten Liga mit ausgeglichenen...
Ein Schnuppertraining mit einem Handball-Weltmeister
Handball: Mit verschiedenen Aktionen will Espace Handball Nachwuchs finden. So leitete Weltmeister Zlatko...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr