Anmelden
Es geit wyter mit de Rüederswiuer Famillie

D Liechti vo Rüderswiu chöme wie o d Liechti vo Signou u die vo Louperswiu us em Hälischwang. Das Dörfli isch bis 1890 ufteilt gsy zwüsche Rüederswiu, Signou u Louperswiu. Si sy dert aus grossi Bure o i de Ämter gsy. 

D Lüthi vo Rüederswiu u die vo Louperswiu sy o verwandt. Bir Yfüehrig vo de Heimatorte sy d Lüthi nid nume im Längebach gsy, o der haub Wittebach het ne ghört. O die Familie het zu de Buregschlächter ghört. E Chaspar Lüthi isch übrigens zäme mit der Frou u vier Ching 1691 uf Brandeburg usgwanderet. Dr damalig Markgraf vo Brandeburg isch froh gsy um aui, wo uf Brandeburg sy zoge, wüu nach em Dryssgjährige Chrieg fasch niemer meh dert isch gsy. 

Rüederswiu het Moser u Mosimaa. Fasch aui Gemeine, wo um d Moosegg ume sy, hei Mosimaa aus Bürgername. Us verschiedene Queue weiss ig, dass dä Name no bis um 1590 gänderet het:  «vo Moos», «zem Moos» oder «Mosi» u de speter «Mosimann» oder äbe «Moser». Dr Ort Moos isch hüt e Wiler, e chli ungerhaub vor Moosegg. Drzue chunnt no der Hof «Aupmoos». Unger de Rüederswiler Moser hani e Profässer Christian Moser gfunge, wo um 1900 ume Profässer für Versicherigsmathematik isch gsy. Es het o Moser vo Rüederswil gä, wo Töifer sy gsy u im Jura hei gwohnt oder no wohne. Mosimann vo Rüederswil hani de drgäge no nid viu gfunge. 

D Nöieschwander vo Rüederswiu wohne sit urdänkleche Zyte z Raufli. Über die Familie het dr Fritz Boumgartner e grösseri Familiegschicht gschribe. D Neuhus sy hüt e chlini Familie, aber eini vo de eutischte. E «Kristen Nuwshus» isch scho ire Urkunde von 1509 Züge gsy. Dr Hans Ueli Nöihus isch dr Nachbar vom Niklous Löiebärger gsy. Er het ne z Sumiswaud de Landlüt vorgschlage aus Obmann. Nach em Chrieg isch er du bös dra choo: D Obrigkeit het ihm aues gno, woner het ghaa u het ne nachhär verjagt. 

I de Gschichte vom Rudolf von Tavel chunnt dr «Raufliharz» vor. Es wüeschts Manndli, dr Schrecke wo aune Ching. Das syg ir würklichkeit der Hans Niederhuser vo Raufli gsy, wo um 1650 dert heig gwohnt. 

Oberlis sy nid öppe die, wo «obe im Dorf» hei gwohnt. Wie fasch au Näme miteme «i» am Schluss isch o das e Verchürzig vomene aute Vorname. Hie wär das – me gloubts im erschte Momänt nid – e «Eberhard» gsy. Me het o dr Name no bis um 1700 ume gäng no «Aberli» gschribe. D Anna Elisabeth Oberli, verhüratet mit em Hans Stettler, isch die berüehmti Bärewirti im Eggiwiu gsy. Oberlis vo Rüederswiu sy über Generatione Wirte u Becke gsy. So isch dr Löie z Rüederswiu lang Bsitz vor Familie gsy. Im Bäre z Raufli chame ds Familiewappe vo de Oberli obe am Chäuerygang no hüt ga luege. 

 

 


30.03.2017 :: Hans Minder, Lokalhistoriker
Meistgelesene Artikel
«Love me tender, love me sweet, never let me go...», schmachtet Elvis dezent aus einem...
Zuerst möchte ich eine kurze Geschichte erzählen:  Ein Blinder und ein Lahmer...
Aeschbacher gewinnt erstmals das Bernisch-Kantonale in Münsingen
Schwingen: Matthias Aeschbacher heisst der souveräne Sieger des Bernisch-Kantonalen. Thomas Sempach...
Eishockey: n der 40. Hauptversammlung des SCL-Tigers-Fanclubs wurden diverse Neuerungen kommuniziert. Unter...
Dinosaurier im Miniformat in Gefahr
Wildtiere vor unserer Haustür: Zauneidechsen würden im Emmental und Entlebuch eigentlich gute Lebensräume finden, doch...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr