Anmelden
Es auts Wort u öppis, wone Nase het

«Grenchen» isch es Stedtli im Kanton Solothurn. Aber o im Ämmitau gits e settige Ort. E Aahöchi zwüschem Ober- u Ungerfrittebach heisst «Gräneche». Das Gebiet isch hüt ganz bewaudet. 

O bi Lützuflüeh hets früecher es «Gänchen» gä. Im Trachsuwauder Urbar usem Jahr 1569 isch e Ort «im Gränchen» erwähnt u das muess z Lützuflüeh sy gsy. Ich ha aber ke Ahnig, wo genau. 

Ds Intressante am Wort «Gränche» isch, dass das uf ds latinische «granica» zrügg geit u das het ursprünglech «Chornspycher» oder «Schüür» gmeint. Speter isch de o e Hof oder Meierei eso benamset worde. Itz chame sech natürlech frage, wie de e rächt stotzige Waud ir Neechi vom Aspigrat zu däm Name isch cho. Ich cha mir das eigentlech nume so erkläre, dass das Gebiet vor Jahrhunderte zunere «Gräneche» – auso zumene verwautete Gebiet het ghört. 

Äbefaus im Gebiet zwüsche Ober- u Ungerfrittebach gits es paar Ortsnäme mitem Wort «Nase»: «Naseschüür», «unger u ober Nase» u no «Nasebärg». Ganz hinger im Oberfrittebach gits de no «vorder u hinger Fluehnase». I hoffe, i heig itz aui erwütscht – süsch muess mi de ar Nase näh! 

Zwe wyter «Nase»-Ortsnäme hani übrigens no gfunge, aber nume aus historischi Yträg. Imene Urbar vo 1547 u speter o i de Amtsrächnige vo 1609 isch «Kapfnasen» erwähnt u das muess bim Chapf im Eggiwiu sy. U imene Dokumänt vo 1569 steit «das guot die Nasenn», wo ir hütige Gmein Lützuflüeh isch gsy.  

Entstange sy die Ortsbezeichnige nid, wüu d Bewohner dert bsungers uffäuegi Nase hätte gha, sondern natürlech wäge dr Form vom Gländ. 

Intressant isch no, dass nid nume Gländevorsprünge, wo vo obe gäge ache vüreluege, eso sy bezeichnet worde, sondern o horizontali Kante. 

Am Schluss wotti no ein «Nase»-Ortsname erwähne, wo no luschtig tönt. Es git nämlech e Nase, wo louft – auso quasi dr Schnuderi het: Ds «Nasegrebli», wo wyter unger i Ungerfrittebach geit. D Bezeichnig chunnt natürlech vo de umligende Höf, woni wyter obe erwähnt ha. Früecher übrigens heig me däm Bächli «Schüürgrebli» gseit.  

 


Queue: «Ortsnamenbuch des Kantons Bern», «Orts- und Flurnamen des Amtes Entlebuch», www.idiotikon.ch u wyteri. Aafrage: 034 409 40 05 oder zuercher@wochen-zeitung.ch

09.05.2019 :: Bruno Zürcher
Meistgelesene Artikel
Letztes Mal, als ich die Kolumne über unser Grosskind Julian geschrieben habe, erhielt ich...
In der Bibel gibt es folgende wunderbare Geschichte. Da hat jemand 100 Schafe. Eines macht nicht...
Die SCL Tigers sollen wirtschaftlich auf mehreren Beinen stehen
Langnau: Nebst dem geplanten zweiten Eisfeld bei der Ilfishalle sind weitere Projekte in der Pipeline: ein...
«Mehr aus dem Geld herausholen»
Langnau: Die SCL Tigers zählen zu den wenigen Hockeyclubs der höchsten Liga mit ausgeglichenen...
Ein Schnuppertraining mit einem Handball-Weltmeister
Handball: Mit verschiedenen Aktionen will Espace Handball Nachwuchs finden. So leitete Weltmeister Zlatko...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr