Anmelden
E wichtige Ort bi de Schafstäu
E wichtige Ort  bi de Schafstäu Ört u Näme:

«Schafhuse» isch äue öppe dr bekanntischt Ort, wo vo dr Bezeichnig här öppis mit Schaf z tüe het. Uf au Fäu isch das Dörfli historisch extrem guet beleit. Die erschte Erwähnige stamme usem 13. Jahrhundert. 

E «Henricus de Safusan» isch imene Dokumänt usem Jahr 1231 erwähnt, wo ds Originau im Staatsarchiv vo Turin ufbewahrt wird. 1240 isch imene angere Dokumänt e «Gerardus de Schafusi» notiert worde u inere Schrift usem Jahr 1271 e «Conrado de Schafhusa». Me fingt bis ids 17. Jahrhundert iche e ganzi Zilete vo historische Belege, wo «Schafhuse» erwähnt isch. Das lat sech unger angerem dür die strategisch wichtegi Laag la erkläre. Das Dörfli isch anere wichtige Verchehrsverbindig gläge, weme vo Burtlef obsi drus het wöue oder vo Bärn ids Ämmitau. Dä Wäg isch vor Wägesse obenache cho, z Schafhuse übere Biglebach u när über Bigu gäge Lützuflüeh zue. «Schafhuse» het o e wächsuvoui Gschicht hingersech. E Zyt lang het das Gebiet vor hütige Gmein Hasli, wo Schafhuse drzue ghört, zum Landgricht Raufli ghört; speter de zu Burtlef oder zu Trachsuwaud. Schafhuse isch bis ids 16. Jahrhundert yche es Zäugdorf gsy u het aus säuber greglet, wie ds Land vo dr Aumänd bewirtschaftet wird. 

No viu euter dörfti d Ortsbezeichnig sy. «Schafhuse» bedütet nüt angersch aus «bi de Schaf

stäu». Ir authochdütsche Sprach het me däm «scafhusun» gseit. 

Es git aber o Ortsnäme mit «Schaf» drin, wo nüt mit de Tier z tüe hei. D Schafgarbe, ir mittuhochdütsche Sprach het me «schafgarwe» gschribe, isch es Chrut, wo o i Ortsnäme ygflosse isch. Es Byspiu isch hie «Schafgarbechnubel», im Gebiet Silwänge bi Sörenbärg. 

Äbefaus i dere Region gits dr «Schäffertosse». Das isch e uffäuige Feusblock, wo aber o angeri Bezeichnige het: «Grosse Tosse», «Näbuspauter», «Schiff» oder o «Glettyse». 

«Schafer» heisst es Heimet, grad näbem Rütihububad ir Gmein Waukringe. Dä Ortsname het zimli sicher gar nüt mit Schaf z tüe – sondern ender mitem früechere Bruef «Schaffner». Das isch so öppis wie ne Verwauter oder e Bevoumächtigte gsy. Us däm Bruef isch de im Louf vor Zyt dr Familiename «Schaffer» u «Schaffner» entstange. 

14.03.2019 :: Bruno Zürcher
Meistgelesene Artikel
Das Alter hat so seine Tücken und auch wenn ich im Sektor von nicht mehr jung, aber auch nicht...
Es gefällt mir, wenn auf den Wiesen im Mai der Löwenzahn blüht. Aber auf meinem...
Ds Bier, wo ir Wirtschaft Signouerhof isch braut worde, isch äue fein gsy: O z Bärn het...
Emmentalisches: Curdin Orlik siegte, ohne einen Gang zu verlieren
Schwingen: Vor 5600 Zuschauern gewann Curdin Orlik am Emmentalischen Schwingfest in Zäziwil. Nebst Orlik...
Ein Konolfinger im Schweizer Cupfinal
Fussball: Sven Joss ist 24-jährig und Fussballprofi beim Superligisten Thun. Der Konolfinger steht vor...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr