Anmelden
E Läderhöseler het z Signou gwirtet

Ds Bier, wo ir Wirtschaft Signouerhof isch braut worde, isch äue fein gsy: O z Bärn het mes verchouft. Im «Intelligenzblatt der Stadt Bern» usem Jahr 1857 hani es Inserat gfunge, wo dr Wirt Rüegg a dr Aarbergergass
z Bärn Signouer Bier verchouft. Ir Zytig vom März 1867 steit de aber o, dass dr Brauichnächt mit Ross u Wage heig wöue dür d Ämme fahre, wüu är dr Umwäg über Zoubrügg nid heig wöue mache. Ir Ämme isch ihm de aber das ganz Fuehrwärch schreg dricho u umkippet. Dr Chnächt heig no chönne a ds Ufer schwümme, ds Ross heig aber das Unglück nid überläbt u ds Bier isch verdünnt Richtig Solothurn gloffe. 

Dr Fritz Aebersold vom Signouerhof het i dr Farnegghole obe e Chäuer ine Feuse la bohre, wüu me o viu Ysch-Platte im Winter het mit Sagmäu zäme i settig Chäuere yglageret, für das me
de im Summer gnue Ysch zum Chüele het gha. Dä Feusechäuer gäbs geng no, isch mir gseit worde. 

1867 hei de d Erbe vom Fritz Aebersold dr Gaschthof mit dr Brauererei la versteigere. Die Ouktion isch am 21. Septämber 1867 im Gaschthof Hof düre-gfüehrt worde. I de Zytige isch das o usgschribe worde. Dr Notar Salzmann het die Versteigerig gleitet. Aues isch ungere Hammer cho: d Brauerei, d Schnapsbrönni, dr Feusechäuer, d Käsereirächt u no es paar angeri Liegeschafte. D Erbe hei aus zu Gäut gmacht, e Tag vorhär isch scho ds ganze Mobiliar
ver-schteigerte worde, zäme mitem Veh. 

Die nächschte 20 Jahr isch de dr Hans Hofer, Wirt u Rosshändler, Wirt uf em Signouerhof gsy. Är het o wyterhin Signouer Bier braut. Nacheme churze Gaschtspiu vomene Gottfried Hodel us Staude isch de 1897 us Bayern dr Karl Rothenanger cho u dä het dert bis 1913 gwirtet u braut. E Läderhöseler z Signou! 

Aber Bier braue her är schynbar chönne. Mir isch auerdings no es Rätsu, wärum är 1897 z Bowiu u nid ds Signou isch ybürgeret worde. Dr Rothenanger isch es gsy, wo e Biergarte mit de typische Chegeleböim bout het. I de Jahr nach em Erschte Wäutchrieg isch niemer lang Wirt gsy. Ersch 1927 het dr Johann Ulmer dr Hof kouft u wytergwirtet bis de d Familie im 1994 definitiv zueta het. 

Dr gross Saau isch scho 1963 abbroche worde. Es Zytli het me o chönne bade, es Badhus het nämlich o über Generatione zum Signouerhof ghört.  


16.05.2019 :: Hans Minder, Lokalhistoriker
Meistgelesene Artikel
«Love me tender, love me sweet, never let me go...», schmachtet Elvis dezent aus einem...
Zuerst möchte ich eine kurze Geschichte erzählen:  Ein Blinder und ein Lahmer...
Aeschbacher gewinnt erstmals das Bernisch-Kantonale in Münsingen
Schwingen: Matthias Aeschbacher heisst der souveräne Sieger des Bernisch-Kantonalen. Thomas Sempach...
Eishockey: n der 40. Hauptversammlung des SCL-Tigers-Fanclubs wurden diverse Neuerungen kommuniziert. Unter...
Dinosaurier im Miniformat in Gefahr
Wildtiere vor unserer Haustür: Zauneidechsen würden im Emmental und Entlebuch eigentlich gute Lebensräume finden, doch...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr