Anmelden
Dr Vorlöifer vom E-Mail: e Pudu
Vo früecher:

I wott nech no chly meh vom Christian Wiedmer verzeue, wo z Signou e Schlosserei het gha u drzue Chefredakter vom Ämmitauer Blatt isch gsy. Si Ehrgyz syg enorm gsy; är het aus dra gsetzt, dass wäge sire Schryberei nid öppe d Schlosserei nid guet gieng. Scho nach es paar Jahr het dr Schlosser Wiedmer zwöuf Gseue gha u drzue Lehrlinge. 

Aber är het gäng drunger glitte, dass är «nume» Schlosser isch worde u nid Akademiker. Är het sech aber politisch vou engagiert. 1845 isch är mit de Bärner ufe Freischarezug gäge d Luzärner. Är isch verlore gange u me het z Signou gmeint, das är äue gfaue syg. Gäge Abe isch är de aber z Fuess unger em Jubu vo de Signouer heicho!

Wüu är Chefredakter isch gsy, het är siner Artikle uf Langnou müesse bringe. Das het är nid säuber gmacht, är het e Pudu abgrichtet, wo ds Gschribnige inere Blächbüchse i d Druckerei het brunge. I dr Druckerei het der Hung de es Würschtli übercho u när syg är wieder über Hälischwang zrügg uf Signou gloffe. 1856 het sogar ds Intelligänzblatt vor Stadt Bärn e Artiku über dä Hung gschribe: Wüu ne e Büüri im Hälischwang heig plaaget! Im Novämber 1857 isch dr Schlosser Wiedmer gstorbe. Si Witwe het mit em Suhn u de Mitarbeiter die Schlosserei wytergfüert bis 1872. De het d Witwe das Huus mit dr Wärchstatt dr Witwe vom Buechdrucker Wyss vo Langnou verchouft. 1896 hets d Bleicherei Schüpbach übernoh u de am Schryner Bulacher vo Schänkon im Luzärnische verchouft. Dä het das Huus de aus Schrynerei brucht, isch aber scho 1900 Konkurs gsy. 1909 isch es de am Schryner Ernst Gerber vo Signou verchouft worde. Dr Ärnscht u si Brueder Sigu sy Küefer gsy u hei verschideni Fessli gmacht für Anke, Sauz aber o Chauberchüble u Bottiche; bsungerbar die grosse, wo me für Söi z brüjie het brucht. Dr Sigu heig drnäbe no mit Frücht- u Gmües ghandlet, auti Glasfläsche u Waffe gsammlet u sech e Name aus Schiilanglöifer gmacht. No öppis: Gärbersch sy Vegetarier gsy! U das zunere Zyt, wo die meischte Lüt nid emau gwüsst hei, was das isch. 

Das schöne Huus isch hüt renoviert u isch es Wohnhus.



27.06.2019 :: Hans Minder, Lokalhistoriker
Meistgelesene Artikel
«Love me tender, love me sweet, never let me go...», schmachtet Elvis dezent aus einem...
Zuerst möchte ich eine kurze Geschichte erzählen:  Ein Blinder und ein Lahmer...
Ört u Näme: O i de höcher glägne Region dörfti itz ds meischte Gwächs gärntet worde...
Schräglage: Platz 6 beim Motorrad-Grand-Prix von Österreich war nicht das Resultat, welches sich Thomas...
Aeschbacher gewinnt erstmals das Bernisch-Kantonale in Münsingen
Schwingen: Matthias Aeschbacher heisst der souveräne Sieger des Bernisch-Kantonalen. Thomas Sempach...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr