Anmelden
Dert, wo d Heide grodet hei

Dr Minder Hans het letscht Wuche über d Gschicht vo de Heimet Hälischwang ir Gmein Signou gschribe. Bi mir isch scho am Tag druf d Fraag ygange, was de Hälischwang bedüti. 

Am beschte fömer grad hinger a mit dr Dütig: «Schwang» chunnt vom authochdütsche «swant» u das meint eigentlech so viu wie «(ver)schwinde». Wiu d Landschaft hieumenang vor langer, langer Zyt zimli starch isch bewaudet gsy, isch es vor auem dr Waud, wo isch gschwunde. Me het Böim u Büsch grodet u ds Land urbar gmacht füre
Acherbou u d Viehhautig. 

Itz chöme mer zum erschte Teu; «Häli». Dert isch es afangemau eso, dass dä Ortsname bis i ds
16. Jahrhundert angersch isch gschribe worde. Warum, dass
das gänderet het isch an sich nid klar. 

Die hütegi Schribwys isch «ersch» so im 16. Jahrhundert ufcho: Imene Urbar vo 1530 steit «zuo Helÿschwandt». I däm Dokumänt geits um die jährleche Zinse u Gülte vom Schloss u Huus Signou, wo dr Junker Ludwig vo Diessbach a Bärn verchouft het. När wird dä Ortsname öppe geng ähnlech gschribe u scho 1610 isch zerschmau «Häleschwand» erwähnt u i de Amtsrächnige vo 1659 steit «zu Hälischwand». Uf dr Wandercharte steit hüt bim Wiler
«Häleschwand» u bim Waud obedrann «Hälischwand». 

Vorhär – auso im 15. Jahrhundert u früecher – isch ds Grundwort es angersch gsy: «Heid». 

Dr eutischt Ytrag woni ha gfunge, stammt usem Jahr 1250 u dert steit «heidenswandon». I de Täubüecher usem 14. Jahrhundert isch «zu Hediswant» notiert. 

«Heid» meint afe einisch ganz augemein «Landbewohner». O ganz glöibegi Lüt sy eso benamset worde – nid nume unglöibegi. De würd «heidswandon» auso bedüte, dass Landlüt das Gebiet grodet hei. Müglech wäri o, dass e Personename hinger «Heid» steckt, eventuell e Churzform vo Adelheid.  

Bi de historische Queue isch no verwirrlech, dass nid nume Signou aus grössere Ort erwähnt isch, sondern o Rüederswiu. Das chunnt drvo, dass ds Gebiet vo Rüederswiu e Zyt lang bis uf Hälischwang isch gange. Es het o d Zyt gä, wo Hälischwang scho zur politische Gmein Signou het ghört – aber zur Chiuchgmein Rüederswiu.

 

Queue: «Ortsnamenbuch des Kantons Bern», «Orts- und Flurnamen des Amtes Entlebuch», www.idiotikon.ch u wyteri. Aafrage: 034 409 40 05 oder zuercher@wochen-zeitung.ch



18.07.2019 :: Bruno Zürcher
Meistgelesene Artikel
«Respekt und geistige Stärke gehören zum Karate»
Karate: Die 16-jährige Larissa Ruch hat klare Ziele: Dieses Wochenende will sie den dritten Teil der...
«Meine Kinder haben mich an Heiligabend eingeladen, aber ich möchte gar nicht hingehen,...
Verlegt Swiss Bankers den Hauptsitz, fehlt rund ein Steuerzehntel
Grosshöchstetten: Die Gemeinde rechnet mit deutlich sinkenden Steuereinnahmen von juristischen Personen,...
Ein kleines Kind in der Krippe. Um seine Geburt ranken sich zahlreiche Geschichten und Legenden....
Vo früecher: Itz luege mir no d Chäserei vor Gmein Signou a. Die «auti» Chäserei z...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr