Anmelden
D Prieschter hei für d Reformation gstumme

Am 6. Jänner 1528 sy z Bärn d Anhänger vor Reformation u d Verträter vor aute Chiuche zäme cho u zwar ir Barfüesserchiuche. Die Chiuche gits hüt nüm, dert steit hüt ds Casino. Das muess veiechly e grossi Sach sy gsy: Es sy fasch 300 Prieschter cho u derzue no e hüüfe Gescht, wo die Sach het intressiert. 60 Lüt unger dr Leitig vom Huldrych Zwingli sy us Züri uf Bärn greiset. Die katholischi Syte het nid so viu Lüt gschickt; die vier Bischöff vo Lausanne, Konstanz, Basu u usem Wallis sy gar nid ersch cho. O us dr Innerschwyz het niemer a das Träffe wöue. Dr Konrad Träger u dr Johannes Buchstab hei die katholischi Syte müesse verträte. Me het, ganz modern, aui Rede detailliert protokolliert. Am 26. Jänner isch fertig gredt gsy, mit 235 zu 46 Stimme (vo de Geischtliche; auso de bishärige katholische Prieschter) isch d Reformation im Kanton Bärn agnoo worde! Scho am 7. Februar 1528 isch ds entsprächende Mandat usecho. D Mäss isch abgschafft, d Biuder ir Chiuche sy abghäicht worde u d Bischöff hei nüt me z säge gha. 1532 isch de o die nöii Verfassig vor Chiuche, dr «Bärner Synod», usecho. Mit Bärn sy o Gänf u Nöieburg reformiert worde, speter de no Sang-Gaue, Müllhuse, Bieu u Lindou. 

D Reformation vom Zwingli ungerscheidet sich rächt vo dere vom Luther. 1525 het dr Strit aagfange u zwar wägem Abendmau. Dr Luther isch dr Aasicht gsy, dass ds Brot u dr Wy würklich zum Lyb u Bluet vo Jesus wärdi, dr Zwingli het gseit, dass das s nume zum Zeiche u zur Aadacht syg u Brot Brot blyb. Dr Luther het auso da die katholische Vorstellige bybhaute, nid aber dr Zwingli. 

Wäg däm Ungerschid hei sech de die zwee 1529 z Marburg uf em Schloss vom Landgraf Philipp vo Hesse troffe. Si hei sech nid chönne einige i däm Punkt. I de angere Frage aber het me d Marburger Artikle verfasst u het sech gägesytig anerchennt. 

Der Zwingli isch radikaler gsy aus dr Luther, wo im Gottesdienscht o süsch viu het bybhaute, wo dr Zwingli het verbote. 

Im Ämmitau isch die Reformation ungerschiedlich ufgno worde. Dr letscht katholisch Prieschter vo Louperswiu isch nach em Träffe z Bärn hei u het grad sofort aagfange es nöis Toufregischter z füehre. Är isch somit dr erscht reformiert Pfarrer vo Louperswiu worde. O fasch aui Mönche vom Chloschter Trueb sy reformierti Pfärrer worde. 

Es het aber o im Ämmitau Gägner vor Reformation gä; i erschter Linie die, wo dür Waufahrte sy rych worde. Zwo Waufahrts-chiuche hets gha: Heiligeland z Affoutere u Würzbrunne. D Chiuche bi Röthebach isch zwar em heilige Stephan gweiht gsy, d Piuger sy aber wägem Heilige Wolfgang cho, wo dert o isch verehrt worde. Är isch im Ämmitau drumm wichtig gsy, wiu är söu häufe, we ds Veh chrank syg. 

 

 


08.06.2017 :: Hans Minder, Lokalhistoriker
Meistgelesene Artikel
«Love me tender, love me sweet, never let me go...», schmachtet Elvis dezent aus einem...
Zuerst möchte ich eine kurze Geschichte erzählen:  Ein Blinder und ein Lahmer...
Aeschbacher gewinnt erstmals das Bernisch-Kantonale in Münsingen
Schwingen: Matthias Aeschbacher heisst der souveräne Sieger des Bernisch-Kantonalen. Thomas Sempach...
Eishockey: n der 40. Hauptversammlung des SCL-Tigers-Fanclubs wurden diverse Neuerungen kommuniziert. Unter...
Dinosaurier im Miniformat in Gefahr
Wildtiere vor unserer Haustür: Zauneidechsen würden im Emmental und Entlebuch eigentlich gute Lebensräume finden, doch...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr