Anmelden
D Erhard sy es sehr auts Rüederswiler Gschlächt
I wott nech no chly wyter verzeue vo de Rüederswiler Gschlächter: D Brand chöme us em Mützlebärg u i bi zimlech sicher, dass d Brand vo Loupeschwiu u de vo Rüederschwiu us dr glyche Familie stamme. Di meischte Brand hei aber dr Heimatort Louperschwiu.
D Brächbüeu sy de wieder Handwärcher gsy, sicher chani dr Bruef vom Seiler bewyse. Unger de Burkhauter vo Rüederswiu hets wieder viu Töiferlüt, wo im Jura hei gwohnt. Um 1830 ume isch e Familie Burkhauter vo Rüederschwiu uf Jegenstorf züglet u e Hans Burkhalter u sy Suhn sy Amtsnotare z Frou­brunne gsy.
Über d Eggimaa u d Ellebärger hani fasch gar nüt funge, i bi nidemau sicher, öbs die beide Gschlächter hüt no git. Die woni kenne hei angeri Heimatorte. D Familie Ängu isch e Handwärcherfamilie mit nume wenige Lüt. Um 1850 ume hei aui Familieväter dr Bruef vom Siuberschmied gha. Denn isch o im Kanton Bärn dr Trachteschmuck ufcho u i däiche, dass die Familie mit däm Schmuck e guete Verdienscht hei gha.
D Familie Erhard ghört zu de eutischte Familie vo Rüederswiu. Dr Melchior Erhard isch scho 1563 Ammann, auso Verträter vom Landvogt, im Dorf Rüederswiu gsy. Der Hof Usserdorf z Rüederswil dörft o dr Stammhof vor Familie sy. Das Burehuus vor Familie Erhard hets übrigens emau aus Bousatz für d Schmauspurbahne «Spur N» gää!
Itz chöme mer zu de Geissbüeler vo Rüederschwiu: Dr Chrischte Geissbüeler (gebore 1682) het 1711 vo sim Schwiegervater chönne d Färberei u Bleicherei z Lützuflüeh übernäh. Die Firma isch bis 2007 im Bsitz vor dere Familie gsy. Sie isch o no hüt aktiv, was für Textilfirme ir Schwyz ja sehr säute isch. Aber weme d Vorbsitzer aluegt, isch die Firma «Geissbühler & Co AG» sit über 300 Jahr ununterbroche i Betrieb. I der Schwyz gits weni Betriebe wo so lang exischtiere. I dere Familie hets o süsch intressanti Persone: Dr Fritz Geissbüler, isch Chrämer im Dorf gsy u dr Nachber vom Pfarrer Bitzius. No öppis Luschtigs hani da: dr Franz Geissbüeler (er isch z La Neuveville deheim gsy) het sech 1795 het dert la ybürgere. Dä het sech aber nid öppe aus «Geissbuehler» la iibürgere, nei er het dr Name «Gueissbuehler» la ytrage. Warum de das? «Geissbuehler» tuet me uf Französisch „Scheissbuehler» usschpräche u das het er nid wöue.

16.02.2017 :: Hans Minder, Lokalhistoriker
Meistgelesene Artikel
«Love me tender, love me sweet, never let me go...», schmachtet Elvis dezent aus einem...
Zuerst möchte ich eine kurze Geschichte erzählen:  Ein Blinder und ein Lahmer...
Aeschbacher gewinnt erstmals das Bernisch-Kantonale in Münsingen
Schwingen: Matthias Aeschbacher heisst der souveräne Sieger des Bernisch-Kantonalen. Thomas Sempach...
Eishockey: n der 40. Hauptversammlung des SCL-Tigers-Fanclubs wurden diverse Neuerungen kommuniziert. Unter...
Dinosaurier im Miniformat in Gefahr
Wildtiere vor unserer Haustür: Zauneidechsen würden im Emmental und Entlebuch eigentlich gute Lebensräume finden, doch...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr