Anmelden
Affoutere u Röthebach hätte lieber Piuger gha

Im Jahr 1528, wo d Reformation im Kanton Bärn ändgültig isch ygfüert worde, het es im Ämmitau nume i wenige Orte Problem gää. Da isch afe einisch Röthebach gsy. D Chiuche z Würzbrunne isch e Waufahrts-chiuche gsy, wo o Lüt us em Luzärnische sy cho bsueche. Me het zersch wöue Würzbrunne abbräche u nume d Chloschterchiueche im Dorf Röthebach bhaute. D Lüt aber sy gäng uf Würzbrunne i d Chiuche. D Chloschterchieuche im Dorf isch nume für d Mönche vom Priorat gsy. Schlussändlech het me de Würzbrunne la stah u d Chiuche im Dorf abbroche. Die hüttegi Chiuche z Röthebach im Dorf isch ersch 1905 bout worde. D Luzärner syge no es paar Jahr uf Würzbrunne piugeret; aber e reformierti Chiuche isch für das äbe doch nid so passend gsy u scho bau sy kener Piuger meh cho. Drmit hei natürlech o d Ynahme us dr Waufahrt ufghört – das het de d Röthebacher scho meh gstört. 

No grösseri Problem het d Ufhebig vom Waufahrtsort Heiligeland in Affoutere gmacht. I dere Kapäue isch es Heiligebiud vor Jungfrou Maria gsy. Bärneschi Beamti hei das Biud de ab-
ghout u me hets aus Brönnhouz bruucht. D Lüt vo Affoutere hätte d Reformation nie wöue. Dr Prieschter von Affoutere, dr Bartholomäus Appezäuer, isch o eine vo de wenige Prieschter gsy, wo ar Disputazion z Bärn isch gäge d Reformation gsy. 

Bir Ufhebig vo de Chlöschter het Bärn eis Problem nid chönne löse: Sumiswaud u Chüniz sy Dütschritterkommende gsy, u dr Dütschritterorde isch im Ussland gsy. Bärn het nid einfach ds Vermöge vo ussländische Staate chönne yzieh. Nach einige Jahre chääre u verhandle het me sech de geiniget, dass Sumiswaud wyterhin ade Dütschritter söu ghöre, dass die aber kener Mönchs-Ritter me dörfe uf Sumiswaud schicke. Das het de bedütet, dass d Lüt reformiert sy gsy, aber d Dütschritter hei no für Jahrhunderti d Ynahme us ihrne Herrschaftsgebiet chönne yzieh. Sumiswaud isch 1698 bärnisch worde, Chüniz sogar ersch 1729!

Es paar katholischi Sache hei d Reformation überläbt: so het d Chiuche vo Marbach no e Mäss-Keuch vom Chloschter Trueb u uf em Schwendelberg oberhaub vo Äschlismatt gits no es Biud vor heilige Anna selbsdritt, wo schyns us em Chloschter Trueb syg grettet worde. 

 

 

06.07.2017 :: Hans Minder, Lokalhistoriker
Meistgelesene Artikel
«Love me tender, love me sweet, never let me go...», schmachtet Elvis dezent aus einem...
Zuerst möchte ich eine kurze Geschichte erzählen:  Ein Blinder und ein Lahmer...
Ört u Näme: O i de höcher glägne Region dörfti itz ds meischte Gwächs gärntet worde...
Schräglage: Platz 6 beim Motorrad-Grand-Prix von Österreich war nicht das Resultat, welches sich Thomas...
Aeschbacher gewinnt erstmals das Bernisch-Kantonale in Münsingen
Schwingen: Matthias Aeschbacher heisst der souveräne Sieger des Bernisch-Kantonalen. Thomas Sempach...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr