Anmelden
Archiv
Wie d Ysebahn isch i ds Ämmitau cho
Chürzlech hani ir Büechermühli ir Nöimühli bi Zoubrügg es Büechli chönne choufe, wo d Ersparniskasse Signou z Langnou (sälig) 1965 het usegä. D Kasse isch denn 125 Jahr aut worde, u i ha gwüsst, dass dr Ruedi Zbinde denn i däm Büechli öppis über d Ysebahn im Ämmitau gschribe het. D Houptlinie Bärn–Luzärn hät me eigentlich wöue über Sumiswaud u Huttwiu führe. Das isch früecher o die wichtegi Linie mit de Poschtgutsche gsy. Vo Bärn hät d Ysebahn o zersch uf Worb söue u de vo dert dür ds Bigetu Richtig Lützuflüe u nachhär äbe über Sumiswaud u Huttu uf Luzärn.
Aber das isch du aus angers worde, wüu me z Worb aui Hebu het i Gang gä, dass me nid dert düre chönn mit dere Tüfusbahn. Me het gseit, dass ds Land vo de Bure nüt me wärt syg, we die Bahn chöm u o d Handwärcher nüt me z tüe heige. Ja me het sogar gseit, dass d Schwyz d Unabhängigkeit verlier, weme ir Schwyz d Ysebahn tüeg boue. Bsungerbar gäge d Ysebahne isch me aber äbe z Worb gsy. Wo d Ingenieure syge cho für ds Vermässe, heig me se mit Chnüpple erwartet. Dr Chiuchgmeinspräsidänt vo Worb heig sogar gseit, es wäre dr chliner Schade, we ganz Worb würd verbrönne, weder we d Ysebahn chiem. D Sumiswauder hei sech derfür gar nid chönne vorsteue, dass d Ysebahn vo Bärn uf Luzärn nid über Sumiswaud u Huttu chönnt ga. Schynbar hei aber zwee Sache schlussändlich dr Usschlag ghä, warum me über Langnou u Wouhuse d Bahn het boue: Afe einisch isch Luzärn drfür gsy u uf bärnischer Syte isch dr Nationaurat Karl Karrer für d Langnouer Route gsy. Dä Karrer isch denzumale eine vo de wichtigschte Politiker gsy im Bärnische, nid nume im Kanton, nei o im Bund u i dr radikale Partei. Eigentlich hät dr Karrer eher für Sumiswaud müesse luege, schliesslich isch si Frou e Sumiswaudere gsy (e Tochter vom Dr. Burger) u ds Sumiswaud het er o gwohnt. Dä Karrer isch o dr Houptinitiant gsy für d Gründig vor Ersparniskasse z Langnou, wo er mängs Jahr Presidänt isch gsy.
I de Jahr 1857 u 1858 het me de aagfange ds Land zämezchoufe. O miner Vorfahre hei ir Ämmematt es Stück Land gha, wo si dr Bahngseuschaft hei verchouft. Im Apriu 1857 het die Oscht-Wescht-Bahn d Konzession übercho u afe Gäud sammle. Dr Gross Rat het d Strecki vo Bärn uf Chröschebrunne bewilliget, aber me het nume afe bis Langnou boue. Luzärn het nüm wöue häufe.
06.08.2015 :: Hans Minder, Lokalhistoriker
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr