 WOCHEN-ZEITUNG FÜR DAS EMMENTAL UND ENTLEBUCH |
Mittwoch, 8. September 2010 |
|
VO FRÜECHER: D Herre vom Napf hei gwächslet
04.02.2010 Hans Minder  I dr letschte Usgab «Vo früecher», das isch am 7. Jänner gsy, het me chönne läse, wie dr Turismus ufe Napf langsam aazoge het. Pärsönlechkeite wie dr Aubrächt vo Haller oder dr Konrad Escher sy ufe Napf ueche u heisech a dr Natur erlabet. Früecher sy d Aupe Napf, Schtä-chelegg u Trimmler zäme gsy. Es isch im aute Bärn e Bureaup gsy, u het dr Familie Hirschi vo Trueb ghört. Die Hirschis sy Senne gsy, im Winter hei sy im Seebärg unger gwohnt u im Summer sy si uf der Aup obe gsy. 1819 hei die letschte zwee Hirschis d Aup verchouft u zwar a mene Adelige. Famos u wyt greist Dr Chöiffer isch dr Herr Rudolf Abraham von Schifferli gsy. Dä isch e ganz famose Herr gsy. Är wär eigentlich Mediziner gsy u de uf St. Petersburg a Zarehof choo. Dert het ärs zum cheiserlich-russische Oberscht u Schtaatsrat brunge u isch vom Zar zum Mitglied vom St.-Wladimir-Orde ernennt worde. Dr Zar het no e Brueder ghaa, wo mit ere junge dütsche Prinzässin verhüratet isch worde. Gfragt het me natürlich keis vo beide. Aber das mit dere Ehe isch du ganz u gar hinger use. Die zwöi heis nid chönne mitenangere; u du isch si ab i d Schwiz u het dr Schifferli grad mitgnoo. Dä isch uf Bärn u het ere dert es Guet besorgt, wo die russischi Grossfürschtin het la umboue. Dert het si de aube o d Bärner VIP’s empfange. Hüt chiem die auso hüfig im Fernseh im «Glanz & Gloria». Dr Schifferli, dr Napfbsitzer, isch ere über Jahre tröi gsy aus «Huushofmeischter» – u drnäbe no aus Vater vo mindeschtens eim usserehelichem Ching. Der Name vo däm glanzvoue russisch-bärnische Hof isch übrigens «Elfenau». D Idee vore Napfbahn Wo gäng wie meh Lüt uf de Napf ueche hei wöue, isch me de afe einisch uf e Gedanke choo, wie me die Turischte dert ueche bringt. Die erschte Idee’ für ne Napfbahn sy uftoucht. 1836 het dr Suhn vom aute Schifferli die drei Aupe wieder sym Meischtersenn, Peter Gärber, verchouft u dä hets aber nid vermöge u die Aupe sy z ersch a ne Buttishouzer verchouft worde u de a Peter Chipfer im Thoracher z Trueb unger. Dr Blitz het id Fahnestange gschlage 1881 het dr Wirt im Bahnhofreschtu z Langnou, dr Niklaus Hügli, dr Napf kouft. Dä het nämlich scho im 1878 ds erschte Hotäu boue. Die Sach isch aber nid lang guet gange, am 29. Juli 1879 het nämlich dr Blitz i d Fahneschtange iigschlage u die Sach isch achebrönnt. D Trueber hei gläschteret, dr Hügli sig säuber gschuld gsy, wärum heig är o mües- se e so ne längi Fahneschtange uf ds Hotäu ueche mache u de ersch no e möschige Adler (aus Messing) druf ueche tue. Dr Hügli het aber du die Sach wieder ufboue u siderhär chönne Tourischte ohni zersch im Trueb vorne z bschteue diräkt ueche uf e Napf u d Uswau isch hüt grösser, aus denn im Jahr 1830. D Bahn isch nie bout worde Aber äbe, warum gö hüt die noble Lüt uf Gstaad oder St. Moritz u nid i ds Trueb? Ganz einfach, es hät haut eifach e Bahn u ds nötige Gschick brucht, u das het gfäut. Haut e chly schpäät, ersch im Ougschte 1891 hei zwe Basler, dr Wilhelm Hetzel u dr Ärnscht Mark es Konzessions- gsuech für ne Napfbahn vo Trubschache uf e Napf gschteut. Denn wärs no nid z schpäät gsy, Gstaad het ersch 1904 e Bahnlinie überchoo. Aber dr Schtaat Bärn het gschperzt u isch dr Meinig gsy, das die Frömde i ds Oberland ueche ghööre u nid i ds Ämmitau. Nach eme länge Hin u Här het de dr Bund die Napfbahn doch bewiuigt u zwar dene zwene Basler. Die hei du afa aagfange, die nötige 1,2 Millione Franke suche, aber das isch nid mügli glunge, u wo du dr erscht Wäutchrieg isch usbroche, isch sowieso aus uströimt gsy wäge Nobukurort Trub. Ehrlich gseit, i däiche, äs isch nid schaad. nach oben
Die Wochen-Zeitung für das Emmental und Entlebuch ist ein Produkt der Herrmann AG.
Design & Technology Copyright by ZiC internet & communication, © 2001 Zollbrueck, Switzerland. Alle Urheberrechte für den Inhalt © 1997 - 2001 Wochen-Zeitung, Herrmann AG, Langnau, Schweiz. |
ORTE & NAMEN: Chätterech U20: Ein junger Parteipräsident, der weiss, was er will SPRUNGBRETT: Vanessa Megert AUSZEIT: Der Schatz in der Kirche VO FRÜECHER: Vo Maler, Vegetarier u Komiker |