Anmelden
1868 isch e Kirchhofer uf Oustralie usgwanderet

D Kipfer vo Rüederswiu sy e chli e komplizierte Fau. Afe einisch isch mir ufgfaue, dass die nie nume Bürger vo Rüederswiu sy gsy – si sy gäng Doppubürger gsy vo Rüederswiu u Lützuflüeh! Die erschte Yträg zeige mir, dass d Kipfer uf em Hof Doggubrunne sy gsy, eine vo de gröschte Höf ir Gmeind. Irgendeinisch hani emau gläse, dass die Doggubrunne-Kipfer vo Waudhus syge. Ob das stimmt, weiss i no nid sicher. 

Es Handwärchergschlächt sy d Kirchhofer gsy, es het Schueh­macher u Lehrer drunger. Hie het scho mau e angere Familieforscher gwärchet u mir es paar Ungerlage la zuecho. Siner Vorfahre sy Pächter uf em Fellbach im Wittebachgrabe gsy. Dr Wittebach u der Wittebachgrabe sy vor 1888 e Exklave vo Rüederswiu gsy. Dä Forscher het mir o e Pass zeigt, wo e Johann Friedrich Kirchhofer 1868 het brucht, wüu er uf Oustralie isch usgwanderet. Das isch ungwöhnlech gsy; dennzumale het me sis Glück meischtens ds Amerika gsuecht. Müglech isch, dass da dr Gouvernör vom hütige Bundesstaat Victoria, dr Charles Joseph La Trobe, tschuld isch. Er isch e Hugenott gsy, zwar ds London gebore, aber er isch mit ere Wäutsche ghüratet gsy. Wonär entdeckt het, das me z Oustralie o cha Wy aaboue, het er Lüt gsuecht, wo wei uswandere. Tatsächlich isch o dä Johann Friedrich Kirchhofer z Ins ufgwachse. 

Lädermaas hani afe ei Stamm ziemlich zäme, nämlich d Schmiedefamilie Lädermaa, wo z Louperschwiu im Ungerdorf hei über Generatione e Schmitte gfüehrt. Die Schmitte isch übrigens imene Doppuhuus unger am Stuwe gsy u isch vornes paar Jahr afe renoviert worde. Dr Teu vor Schmitte isch so aut gsy, das me hät chönne es Museum drus mache. 

Iitz chöme mir zu de Löiebärger vo Rüderschwiu. Da chani nache­wyse, dass die ursprünglich us Raufli chöme, u de uf em Oberhof u ir Gmein Louperschwiu es Heimet hei kouft. Dr Chöifer isch e Niklous Löiebärger gsy, wo vo 1580 bis 1600 o Eigetümer vor Herrschaft Wartestei isch gsy. 1594 isch er im erschte Chorgricht vo Louperschwiu ghocket. Eine vo sine Sühn, dr Hans, het sech um 1610 auf em Hof Schönhouz ygwybet. Si Suhn de wider isch dr berüehmt Burefüehrer Niklous Löiebärger gsy. 

 

 

16.03.2017 :: Hans Minder, Lokalhistoriker
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr