Anmelden
Wo dr Bitzius uf aune viere übere Stäg isch

Im Septämber wirde ni zäme mit em Ruedi Bieri afe einisch zeige, was mir i de letschte Jahre hei über Trachsuwaud usegfunge. 2018 wirds 50 Jahr här sy, dass dr Dürrgrabe isch uf Heimisbach umtouft worde. Ds Buech muess drum denn fertig sy. Ir Wuche-Zytig wird me de chönne läse, wie me zu somene Buech chunnt. Eis isch scho sicher, so um 700 Syte wird das de scho ha!

So für aazfaa wirdeni hie es paar Müschterli bringe: Ds Dorf Trachsuwaud isch e zimli komplizierti Sach: Nume guet ds haube Dorf ghört i d Gmein Trachsuwaud, d Gränze vo Lützuflüeh geit meh oder weniger z mitts düre. Früecher isch das no viu komplizierter gsy, wiu ds Chrämerhus aus Enklave usparzelliert isch gsy u zur Gmein Lützuflüeh het ghört. Möschbergers, wo über Generatione sy Chrämer gsy, sy Bürger vo Lüzuflüeh! O dr Hof, wo hüt Scheideggers ghört, isch z Lützuflüeh gsy. Drfür isch dr Hof Bühlmatt, wo hüt zu Lützuflüeh ghört, dennzumale ir Gmein Trachsuwaud gsy. 

Itz wotti no öppis übere früecher Wirt Hansueli Lanz verzeue. Dr Zuefau hets wöue, dass i im Staatsarchiv öppis über d «Tanne» ha gfunge. Im Jahr 1944 het e Herr Schänk über nes paar grösseri Beize gschribe, drunger o über d «Tanne». Är isch dert gsy, aber me het ne de uf Sumiswaud i d Haule gschickt, wiu dr aut Wirt, dr Hansueli Lanz, d «Tanne» sim Suhn het verschribe u säuber no einisch nöi het aagfange. 94 Jahr aut isch er denn gsy u sit 75 Jahr Wirt! 

Dr Lanz het e hüüfe Müschterli gwüsst. Eis drvo isch das, wo är het übere Pfarrer Bitzius verno. Dr Pfarrer Bitzius isch e Konservative gsy, u dr radikau Regierigsstatthauter het ihm nid passt. So hei es paar Pfärrer mit konservative Politiker ir «Tanne» gratiburgeret, wie me am Statthauter chönnt a ds Bei bisle. Spät syge die Herre ufbroche u heige feiechli «Öu am Huet» gha. Dr Stäg über d Grüene vor Grüenematt heig denn no kes Gländer gha. Dr Pfarrer Bitzius heig churzerhand d Fäcke vo sim Frack i d Hose gstosse u syg uf aune viere übere Stäg gschna-agget. Däne aacho, syg är ufgstange u heig gemeint, es syg guet, dass dä chätzersch Statthauter das nid heig gseh. 

Irgendöpper hets glych gseh. Dr Pfarrer Bitzius heig zwee Tag speter vom Statthauter es Briefli übercho, wo dä schynheilig fragt, ob är guet sig übere Stääg cho!


20.07.2017 :: Hans Minder, Lokalhistoriker
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr