Anmelden
«Pfui» het dr Ritter zu Salat gseit

Salat isch früecher nid so beliebt gsy wie hüt, aber me kennt das scho lang. Dr Minnesänger Wolfram von Eschenbach jammeret i sim Värsroman «Parzival»: «Da brachte ein des wirtes Sun Purzeln unde latun, gebrochen in den vinaegar»  – dr Suhn vom Wirt het Portulak u Lattlech, broche im Essig, brunge. Dr Wolfram von Eschenbach isch dr Meinig gsy, dass e Ritter vo so Salat nid gnue Chraft chönn tanke um sys Schwärt möge z füehre. 

I ha no gärn Salat, nid so, wie e Maa, woni chürzelch inere Wirtschaft ha ghört. Si Frou het wöue, dass er zum Menü no Salat bsteut: «I ha doch scho zwöi Mau Salat gha die Wuche!», het dä de gmeint. Basta. 

Was me hüt für Salat het, dörfti me o scho zur Zyt vor Frou Rytz kennt ha. Uf au Fäu hani nüt gfunge, wo hützutags öppis ussergwöhnlechs wäri. Intressant isch no, wie si dr Zibelesalat het gmacht. Si tuet die Zibele ganz, ir Schale i d Äsche vom Herd-
füür u lat se dert la ychoche. Nachem Abchaute tuet si se rüschte u de macht si us dr Zibelemasse e Salat. 

Bim Fleisch chame i dene Rezäpt klar gseh, dass me aus het brucht. Hüt gits ja wieder Chöch wo «nose to tail», auso vor Schnouze bis zum Schwanz, tüe propagiere. I ha o es Rezäpt für gfüuti Söiöhrli gfunge – aber das lömer itze. 

I ha scho einisch gschribe, dass ds haube Buech vou Rezäpt isch für Dessär. Ganz wichtig sy dennzumale Eierschpyse gsy, wo me im Anke usbrate het. Hüt kenne mir da zum Byspiu no d Berliner oder Öpfuchüechli. Dennzumale hets da no viu, viu meh gää. 

Chüeche u Turte isch es ganzes Kapitu gsy. Hie zum Byschpieu dr Himbeerichueche: Me nimmt dünn uströölete Chuecheteig, tuet e chly Mäu drüberströie u beleit dr Teig mit Himbeeri. No einisch es chly Mäu u tou Zucker von Zuckerstock raffle (wie rycher das me isch, umso meh!) u nachhär i Ofe. Me cha de nachhär, we dr Chueche schön bache us em Ofe chunnt gäng no einisch mitem Zuckerstock u dr Raffle drüber!  

08.11.2018 :: Salat isch früecher nid so beliebt gsy wie hüt, aber me kennt das scho lang. Dr Minnesänger Wolfram von Eschenbach jammeret i sim Värsroman «Parzival»: «Da brachte ein des wirtes Sun Purzeln unde latun, gebrochen in den vinaegar» – dr Suhn vom Wirt het Portulak u Lattlech, broche im Essig, brunge.
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr